絲絲講場：星展豪氣 勸同鄉小心
尋日星展第一次喺香港開董事會，三大管理層齊齊聚首一堂！雖然集團主席佘林發（Peter）話今年揀喺香港開會無咩特別原因，但佢哋香港區CEO龐華毅（Paredes）就爭住話，集團一直覺得香港市場非常重要，仲不斷投放資源。
在港員工年增400人
據絲絲所知，星展香港區員工已經由舊年4,200人，加到今年4,600人，咁大家就知香港係不斷擴充啦！
其實咁多銀行睇好香港都唔係無原因，好似傳聞會喺十月開通嘅滬港通，直情係大家眼中嘅大商機，個個爭崩頭！同樣嚟自新加坡嘅華僑銀行，都透過收購永亨（00302）嚟打入香港市場。
秘密武器搶滬港通
面對同鄉趕嚟分一杯羹，Peter就話好歡迎，因為香港競爭一向好激烈，星展一定會繼續做好自己業務，仲祝對方好運咁話！
講到呢度，大家可能都會好奇，星展究竟有咩武器迎戰滬港通呢？唔好意思，星展執行總裁高博德（Gupta）話，呢個係「不能說的秘密」！
余絲韻