絲絲講場：林天福唔捨得貿發局
貿發局總裁林天福（Fred）十月一日過檔機管局任行政總裁，尋日貿發局搞咗個大型酒會，歡送呢位服務咗貿發局28年、擔任總裁達10年嘅「老員工」，到場仲有過百名中小企老闆。
今年56歲嘅Fred同絲絲茶敍時，提到自己半世人打貿發局一份工，要離開好唔捨得。雖唔肯多講「燙手山芋」機管局，但就話首日返工雖為公眾假期，但已計劃去機場視察，只係擔心自己搭錯車去咗會展返工。
接任機管局CEO未驚過
Fred話從來無諗過轉工，但的確有想過退休，遇上機管局呢個機會，話自己電池仲有電，可以服務香港。
過檔另一原因係覺得機構換領導人係好事，發展會更健康。對於有人質疑佢無航空業經驗，佢回應話過去三任機管局行政總裁，其中兩任都無相關背景，仲引用阿里集團主席馬雲入股恒大足球隊時講「外行可以領導內行，但必須尊重內行」。
同蘇澤光下年再共事
有人問Fred喺貿發局28年，覺得自己最大貢獻係乜？佢笑住話公司微波爐由一個增加至六個，帶飯嘅同事方便咗好多。
明年接任機管局主席嘅貿發局主席蘇澤光喺酒會致詞時，笑言好開心Fred先去機管局打點好，最好先學好叫啲海豚游開啲，仲要籌多少少錢，應付興建第三條跑道，兼唔好超支同超時，呢樣就要參考吓港鐵（00066）喎，全場即時爆笑。
余絲韻