Market Insight：數碼通業績見底

本周美國聯儲局議息，從債息的變化，似乎市場有心理準備，聯儲局主席耶倫可能會調整市場對息口向上的預期，預告一五年第一至第二季開始加息。上周歐盟理事會主席范龍佩，確認歐盟進一步制裁俄羅斯，除非俄羅斯於九月底前對烏克蘭的停火計劃能夠令歐盟滿意。

地緣政治的不明朗因素，加上美國退市可能比預期早，美元相對其他貨幣息差存在優勢，美匯指數連升兩個半月，上周見過84.53的十四個月新高，持續高位徘徊，上周五收84.24。

古勝冇點你2014/09/15

萬里長空

芬佬憧憬仲未死心

美匯轉強，意味掛鈎的港元兌非美元貨幣同步強勢。由歷史所見，這對港股向來不太有利，加埋近日流入港匯熱錢，確實有減弱迹象，恒指見25,326點海嘯後新高後，過去幾日市況氣氛逆轉之快，也實在出乎意料。

大市已連跌六日，上周五跌67點收報24,595點。前星期，挾溢價H股挾升568點，當時起步位24,749點都告失守，意味過千億元成交當日追貨的，已經齊齊坐艇。

唯一較為慶幸是，上周的跌市成交逐少縮減，基金沽貨的積極性其實唔算太強，事關個個芬佬心裏都仲有一絲盼望，阿爺會在十月滬港通正式開車前，炒起個市等今次港滬股市互通，開波唔好太過失禮。

上周國統局公布八月份內地CPI，按年升2%，低過預期，八月PPI跌1.2%，比七月跌幅擴大，且連續三十個月按年呈現跌幅，對上一次已經要追溯到九七至九九年期間，反映內地產能過剩情況，並無改善。經歷近排每下愈況的經濟數據，本來古勝估緊下半年，中國由「微刺激」轉向「強刺激」，由定向降準提升到全面降準，甚至減息的可能性都會增加。

殊不知上星期，總理李克強在達沃斯論壇發言，又為7.5%GDP增長作出解釋，講明高一點，低一點都可以接受。一句講晒，是要減低市場對中央大放水的期望。到底係打兩手牌，做預期管理，等市場無心理準備下令出招威力增強，抑或真係接受7.4、7.3、7.2甚至7.1？十月中第三季GDP曝光前，真係估佢唔到。

iPhone教人又愛又恨

上周五下午三點後，香港經濟似乎停頓咗兩三個鐘頭，身邊個個人攞住部手機起勢咁refresh，全民為iPhone 6大抽獎遊戲而瘋狂。查實同對手三星，或者內地新冒起手機企業，三分之一至一半價錢已經買到同樣規格手機，偏偏蘋果公司就有一股獨特吸引力，叫人邊罵邊買。

隨住替蘋果供應零部件及手機組裝的瑞聲科技（02018）及富智康（02038）等，在新機發布前，股價已經開始有鳥獸散迹象，估計基金經理都趁好消息出盡派貨。對於股市投資者而言，iPhone 6的相關古仔係咪就咁玩完，咁又未必。

上星期iPhone 6開始預訂之後，本地電訊商陸續公布跟機上台價，社交網站的討論可謂一面倒，大都高呼電訊商㩒住搶！個人實例，用400元左右的無限上網已經取消，如果轉用新出10Gb上台月費計劃，每個月月費加到貼近700元，大升七成多！

話就話今次iPhone 6加咗價，手機補貼金額高咗，但用excel計一計，減去補貼的實際月費，幾個電訊公司統統加幅唔細，仲未計每月用近20Gb數據，如在下一類的高用量用戶，埋單額外每Gb畀錢的一班待屠肥羊。

電訊市場回復壟斷

本來CSL被收購，少個香爐少隻鬼，預咗香港電訊市場會逐漸回到寡頭壟斷的局面，只係想唔到會快殺到埋身，周末搵埋美國AT&T及VeriZon兩間蘋果公司合作電訊商的買機上台價比對，以前香港平過美國的情況不復再，更加證實想法無錯。

睇落上半年業績示人以弱的數碼通（00315）及和電香港（00215），在iPhone 6狂熱，低頭族又行唔返轉頭，業績應該見咗底。

此外，中石化（00386）昨晚公布出售下游業務30%股權，總共有25名投資者認購，包括國壽（02628）、騰訊（00700）有份參股的基金、中金前海發展、嘉實資本、海爾電器（01169）及匯源果汁（01886）大股東朱新禮等，涉資逾千億元人仔。

古勝