近期輪場多喜臨門！港股氣氛轉旺，輪場生意多咗唔在講，最開心嘅係，今年多位「輪后」相繼有喜，可喜可賀呀！
中銀國際股票衍生產品董事朱紅（Niki）好高興同絲絲分享，話自己已懷有第二胎，預產期係明年三月，明年係羊年，唔知會係「羊仔」定係「羊女」呢？咁依家2歲半嘅大女以後就多個伴了，認真樂也融融。
唔知係咪有經驗，Niki好坦白話近排仲未戒口，照食壽司等生冷嘢，真係畀佢激親。而佢同天下父母一樣，話生仔定生女都冇所謂，最緊要BB健康，並期望可延續上次嘅美好經驗：餵BB一年人奶。
另一位要恭喜嘅，係有咗7個月嘅法巴上市衍生產品部執行董事郭小菱（Shirley）。Shirley一家除咗兩歲大嘅「小龍女」、愛犬Cotton仔仔，嚟緊十一月底更會添個「馬女」，一家五口想必熱鬧非常。絲絲記得，Shirley上次BB足5個禮拜就即刻訂定醫院床位，今次佢就淡定得多，畢竟有經驗，仲笑話啲BB衫可以重用添。
至於剛喺六月升呢做靚媽嘅法興環球股票產品部副總裁蔡秀虹（Eva），就繼續放產假陪BB。絲絲見佢最新喺個人facebook上載多張仔仔靚相，好得意好幸福啊！
余絲韻