孖妹Ｓ檔案：金融百獸圖 解讀市場生態
古人好以動物寓言說出大道理，喺經濟及金融市場上，亦有人以不同動物比喻各類市場參與者，多到甚至可以拼湊出一幅「華爾街百獸圖」，所以孖妹今回搵嚟幾位學識之士，一齊研究下投資市場上嘅人性百態！
蘇：恒生管理學院商學院院長 蘇偉文
莊：中文大學全球經濟及金融研究所常務所長 莊太量
大戶如「獅」雄踞高位
Kitty：又到中秋佳節，「嫦娥奔月」嘅故事我哋就聽得多，咁彩兒你又知唔知「玉兔」嘅由來？
彩兒：唔話你知住，等我賣個關子先。講到動物，我諗起唔少比喻大戶投資者嘅代名詞，好似「大鱷」、「狼」、「獅」等等，為金融市場呢個數字世界帶嚟更多想像空間，亦更凸顯佢哋貪婪狂妄嘅面目！
蘇：獅子係掠奪性動物，又被稱為「萬獸之王」，唔少人會借佢嘅特性嚟比喻大戶。但其實呢班人喺金融市場上都唔係戰無不勝，面對市場力量，佢哋有時都會輸，好似AIG、雷曼，甚至係高盛，都曾因資金問題而向政府及其他機構求助，所以我覺得佢哋嘅地位只係畀大家神化咗。正如喺草原上，如果忽然間火山爆發或有隕石撞地球，其實連萬獸之王都走唔甩。
彩兒：但動物本能始終厲害，喺天災發生前，佢哋好快就感覺到「有唔妥」，然後「走為上着」。可惜，人類似乎已經失去呢種本能。
蘇：喺金融市場上，其實都有種叫「聰明錢」。佢哋識得分辨市場氣氛，知道幾時可以「撈底」，幾時唔可以「高追」，理性咁面對市場上嘅不理性。
散戶跟風「羊」性難改
Kitty：以前嘅投資者，對金融市場唔熟悉，鍾意「人買我買」，結果好易成為羊牯。唔知今時今日嘅投資者又有無進步到？
蘇：「羊群效應」係人性嚟嘅，唔係一時三刻可以改變，因為人好難戰勝心魔。想降低風險，散戶可以月供買入股票，但佢哋好多時只會諗：「我有錢，做乜我要分段買？」加上依家股市流通性咁高，上網按個掣就可以隨時「揸沽」！
莊：「羊群效應」呢種集體行為其實可以理解。呢類投資者普遍年紀較大、有資本但少知識、欠分析能力，所以惟有跟人買或者向個別「財演」取經啦。
彩兒：經濟學假設人類經濟理性，面對唔同階段嘅風險回報取態都相同。但係人好多時都「衰貪心」而做出唔理智嘅決定，豈非與經濟學背道而馳？
蘇：人不嬲都貪婪。貪婪唔係問題，亦無與經濟學背馳。現實世界嘅金融市場及人性，遠比書本上嘅經濟學理論複雜。人類嘅心理及行為充滿變數，所以先令股市「咁好玩」。
莊：投資出現虧蝕後進行嘅「事後分析」，當然可以好「馬後炮」咁話人「唔理性」啦！但如果考慮埋事前做決定時嘅資訊限制，咁所有投資決定其實都係理性嘅。
市場仿似「海洋生物」
Kitty：我最近先翻睇完電影《華爾街狼人》，「狼人」喺入面嘅貪婪狂妄兼奢華揮霍，真係令我對金融市場嘅印象即時扣晒分！
蘇：我認為金融市場為人類提供獲取資金、發展社會經濟嘅機會。佢本身就好似一個海洋，孕育出唔同嘅生命，當中亦有唔同嘅生態同動物，可以比喻為各有形態及目標嘅投資者。
例如市場上嘅大戶猶如鯊魚，嗅覺敏銳，專門追蹤「血腥」味；機會投資者猶如海中嘅突擊型魚隻，一見「獵物」就出擊；喜歡「跟大隊」嘅小魚群，就同「羊群心態」嘅小投資者好似；另外又有好多默默咁吸收養分成長嘅珊瑚、海草，就好似啲買股收息嘅人。
莊：喺資本主義社會下，人類行為以利益最大化為依歸，難免令人感覺冷血。好似領匯（00823）私有化上市後，為追求利潤而年年加租，旁人睇落覺得好無人情味，但資本主義下嘅社會，要咁運作先暢順。
「松鼠」穩健 以慢打快
彩兒：孖妹仲聽過唔少同動物有關嘅財經術語，又「蝴蝶」又「天鵝」，果然係想像力豐富！你哋又會用咩動物比喻自己？
蘇：我鍾意長線投資，唔會不停買賣，咁靜態，睇嚟用植物形容我比較合適。
莊：我係穩健進取型嚟o架！用「松鼠」啦，積穀防飢、儲埋慢慢食吖嘛！
妍：《香港華爾街的孩子》作者 妍宇（筆名）
香港「華爾街」龍蛇混雜
妍：《香港華爾街的孩子》作者妍宇（筆名）
Kitty：你喺香港「華爾街」（中區金融中心）嘅美資投行工作咗十幾年，又曾經出書講述你喺行內嘅經歷同感想，唔知真正嘅華爾街對你嚟講又係點？
妍：我相信唔同市場嘅參與者有各自利益，但從我角度所見，華爾街聚集咗好多精英，亦有好多人為金融市場發展作出巨大貢獻。
彩兒：你去年推出第二本書，講述混合債嘅前景，孖妹同班姊妹當然都有捧場。我哋期待你嘅下一本著作！
妍：我依家喺投行工作，每日都遇到好多人和事，尤其係客戶，都令我深受啟發。我希望繼續積累人生及市場閱歷，以後再有機會推出人性化作品。
如「兔」般觀察創新
Kitty：九月剛開始，商科子弟又要埋頭書海繼續向目標進發，亦有一班金融界新丁要踏入社會大學喇！你會點同佢哋打打氣？
妍：我想勉勵吓年輕人，工作時要「做好本分、持之以恒、唔好好高騖遠」，任何事都要存有關懷及感恩之心。
我三歲嘅囝囝屬兔，所以我都寄語年輕人要好似「兔仔」咁：耳朵要長，要仔細聆聽；眼睛要看得遠，分辨出商機和風險；腿要跑得快，為市場不斷創新作出努力；最後要保持純潔的心，好勝之餘對市場負責。
華爾街「百獸」大解構
牛：比喻股市好友，憧憬市場向好的投資者。
熊：比喻股市淡友，預期股市會持續下滑的投資者。
獅：比喻市場上的大戶投資者。
鷹：比喻眼光尖銳、善於把握機會出擊的投資者。
羊：比喻對投資或金融市場一知半解，沒有個人投資策略、只道聽途說的投資者。
豬：比喻因貪婪而變得利欲薰心、失去理智和投資原則的投資者。
鴕鳥：比喻只選擇性關注消息的投資者，主要採取逃避或消極性的「鴕鳥政策」。
斑馬：比喻不論股市風雲變色，都仍貫徹其原有投資策略的投資者。
Kitty 彩兒
若有料報畀彩兒同Kitty或有嘢問，可電郵money.biz@on.cc