絲絲講場：「洋參大王」靚車晒冷
「洋參大王」楊永仁鍾意靚車鍾意到咩程度？佢名下有十一部靚車，當中就梗係有林寶堅尼、法拉利啦！仲要係好Colorful，好難唔畀路人眼(目及)(目及)，絲絲尋日有幸坐吓部林寶堅尼，真係有輕飄飄嘅感覺，不過佢近來瞓身投入恒發洋參（00911）嘅業務，已經少咗揸靚車。
名車部部有特「色」
絲絲坐嘅，係全亞洲唯一一部青蘋果色林寶堅尼，楊生部勞斯萊斯係粉藍色，法拉利係鮮黃色，架架都咁Colorful，簡直係絲絲至愛，影出嚟真係靚爆。
佢話自細已經鍾意揸車，若然要數最貴個部，必定係上年先入嘅青蘋果色林寶堅尼，索價超過800萬元！尋日絲絲坐完林寶堅尼，再坐埋部粉藍色勞斯萊斯，喺中環兜咗個轉，不知有幾多人攞部手機出嚟影相。
貴為恒發洋參主席，楊永仁好忙，六月至完成上市，至今都未得閒唞吓，所以近排已經少咗揸。
嗜好多 玩開遊艇古董
絲絲見佢啲車，好多都係跑車，之但係香港馬路人多車多，咪嘥咗啲跑車？佢話：「以前會趁凌晨出街兜幾轉，四點幾五點嗰陣最少人！」楊永仁仲話佢「鍾意靚嘢」，所以除咗名車，佢仲有一艘遊艇，仲鍾意儲中國古董添，真係嗜好多多！
余絲韻