絲絲講場：18歲學生有諗頭迷倒朱仔
18歲，呢個年紀嘅香港後生仔女應該為中六文憑試DSE拚搏緊，希望拎返幾粒星、入間好大學，然後畢業有份好工做。不過，你一定冇諗過，呢個年紀已經有人做完實習，仲畀facebook（fb）請埋添。Michael Sayman呢個啱啱畢業嘅美國高中學生就有住咁傳奇嘅經歷。
請做全職工程師
根據彭博社報道，喺舊年，Michael Sayman收到個email話fb創辦人朱克伯格想見佢，佢仲以為畀人整蠱添。今年夏天，佢就獲朱克伯格邀請，帶埋媽咪免費搭飛機去咗fb喺加州嘅總部實習，前兩日，佢更加喺個人嘅fb戶口向大家宣布，已經被fb正式取錄為全職工程師（Engineer），成為呢間公司最年輕員工。
曾推fb遊戲程式
究竟點解一個後生仔會無啦啦畀呢間美國硅谷大公司創辦人朱克伯格留意到呢？原來，Michael曾經利用fb為發行者設計嘅工具，喺Apple Store發表過一個叫4Snaps嘅遊戲。呢個應用程式嘅玩法係，玩家可以影四張相，再send畀朋友，叫佢哋估一個字。咁有諗頭，唔怪得之得到朱克伯格賞識喇。
余絲韻