舊年年尾有多間公司想收購「閱後即焚」傳送影片軟件Snapchat，當時大家已經覺得估值太高，但Snapchat都將幾門親事拒諸門外，就算facebook出到30億美元，佢都不為所動。日前又有消息傳出美國風險投資基金KPCB想注資Snapchat，令公司估值衝上100億美元（約780億港元）。
一如舊年嘅市場反應，有人質疑100億美元嘅估值完全離晒大譜。但Twitter嘅CEO科斯托洛（Dick Costolo）就隨即護航，喺自己嘅Twitter上留言大讚Snapchat前途一片光明，有瘋狂的增長，所以「呢個估值一啲都唔荒誕。」
Snapchat嘅賣點係「閱後即焚」，依家仲陸續加入其他新元素，希望可以吸引更多嘅用家。絲絲就聽聞Snapchat仲諗住殺入廣告界，廣告口號係：「10秒鐘後，你睇緊嘅個廣告就會消失！」係咪好有Selling Point呢？唔知呢個新計劃可唔可以證明畀大家睇Snapchat絕對值百億美元呢？
余絲韻