絲絲講場：「水哥」分享恒生廿年情
絲絲收到風，原來今日（周五）就係恒生銀行（00011）傳訊及可持續發展總監張樹槐（Walter）做夠廿年嘅大日子。
人稱「水哥」嘅Walter，已經服務咗恒生二十載，佢特登寫咗封Email，以「感恩及感謝」為題，當然不忘憶述吓多年嚟工作上嘅難忘事啦。
廿年見盡金融起跌
Walter出名鍾意跑馬拉松，同時亦已「跑」過晒香港金融業嘅高低起跌，好似九七金融風暴同○八年金融海嘯，可謂見慣風浪。
佢話好榮幸喺呢段職業生涯入面，曾經同恒生五位行政總裁及四位主席共事，包括業界尊敬萬分、去年辭世嘅著名銀行家、恒生銀行前董事長利國偉。
當然佢仲好感謝共事多年嘅團隊。Walter喺最後仲贈咗各為「巴打及絲打」兩句聖經金句：「我要向山舉目；我的幫助從何而來？我的幫助從造天地的耶和華而來。」真係完全體會佢嘅不捨之情，同作為公關界「老大哥」嘅風範！
余絲韻