阿里巴巴嚟緊好快就會喺美國公開招股，正所謂人逢喜事，日前阿里公布嘅季績多賺1.8倍至123.44億元人仔，令到公司嘅內部估值衝破萬億元人仔！
彭博社億萬富翁指數就率先幫馬雲嘅資產計數，發現49歲嘅佢身價已經飆升至218億美元（約1,700億港元），即時坐上中國首富嘅寶座。
作為中國最大嘅電子商務公司，阿里呢排就努力準備緊美國IPO，預計下個月就會喺紐約證券交易所上市，呢單嘢仲可能喺美國史上規模最大嘅IPO個案，阿里市值估計都有1,540億美元。
至於馬雲名下嘅資產，佢依家持有8.8%嘅股份，唔計當中1.5%由馬雲慈善組織控制嘅股權權益，佢實際持有嘅股票價值有113億美元。加埋之前冇計入去佢身家淨資產值嘅支付寶母公司近半數股權，佢就搖身一變成為中國首富喇。
喺彭博社億萬富豪指數嘅排名入面，絲絲留意到名入三甲嘅都係同科網有關，佢哋似乎愈戰愈勇喎。排第二嘅係騰訊控股（00700）創辦人馬化騰，但同馬雲身家依然仲爭一大截，只係得163億美元。至於第三位嘅呢就係百度創辦人李彥宏。
科網巨子BAT包攬三甲嘅情況，喺今年度先後公布各個排行榜都有出現過，今次又再一次發生，睇嚟科網強勢將會繼續。
余絲韻