Market Insight：海爾基本因素取勝

從國債收益率表現看，資金在押注歐洲將有更多貨幣刺激政策消息出台，更有大行預期最快九月初就有量寬措施出台，不過都係唔好有太大期望！講番港股，在期指結算日先升後跌，恒指報24,741點，跌177點，主板成交增至804億元，高達1,125隻股份下跌，真係有點「災」味！連續兩日高開低收，基本上已確認大市暫未有足夠動力闖更高水平，調整開始。

展望九月，魚缸焦點不離阿里巴巴上市以及關於滬港通及國企改革等消息。滬港通兩地市場參與者系統測試至今進行順利，相信九月份兩地市場參與者都會加大客戶推廣力度。不過，相信初期內地股民對港股通興趣未必太大，皆因早有渠道參與買賣。反而滬股通應是焦點，畢竟「中國故事」仍為不少境外投資者所嚮往。

古勝冇點你2014/08/29

萬里長空

炒股向來跟紅頂白

魚缸係淘金之地，邊瓣有得炒有錢搵，自然係資金所向。熱潮一來，個股可以捧到上天價，但熱潮退卻，踩到變地底泥冇人吼。八月恒指曾上番25,000點樓上，但距○七年高位32,000點尚有一段距離。有說法指係佔比達一半的中資股唔生性，又指期間大摩香港指數跑贏大摩中國指數，顯見港股好唔係一定要靠中資股，依家反而被連累云云。

古勝認為，香港經濟規模其實有幾大、香港指數依賴地產行業比重有多大，大家心知肚明。若非有咁多大型中資股在港上市，市值規模細小的港股，仍停留於十幾年前咁耐唔耐就成為海外大鱷興風作浪的提款機而已。

再講，這些年中資股成長為股民帶來過唔少投資機遇，不乏長線收息、甚而財息兼收之選，如騰訊（00700）由幾蚊升到幾百蚊，有錢贏就冇人話係「陀衰家」﹗

偏頗得更甚的言論，係話滬港通等於北方魚缸濁水與香港魚缸清水相結合，結果香港自成輸家云云，但其實世界哪有一個水源可以完完整整切斷分開清與濁？本來同一源呢個事實終歸要面對。其實每逢轉變，總會帶來問題，反正聽到呢類言論，睇完笑吓好了，入腦的話會容易影響投資決定的準確度。

趁高抽水例牌動作

講番股票，藍籌股中，呢兩日中移（00941）表現強於大市，中電信（00728）公布完業績亦連升兩日。查實中電信係三大業者中4G網投資最落後的一員，未來要趕上，資本開支龐大。三大合組鐵塔公司，有助紓緩投資4G業務的資本開支壓力，呢個角度睇對中電信最幫得上忙，只是短線升到呢啲位再上水位未必太多。

魚缸水位尚處高位，企業都把握骨水機會。石藥集團（01093）停賽，據講係母公司沽貨減持，呢啲時候唔做更待何時！內房碧桂園（02007）15供1，集資30多億元，用作再融資同一般營運資金。查實唔少內房都想抽水，問題係中小型業者風險太高冇基金吼，反而類似碧桂園呢類較大規模且有大孖沙坐鎮的，仲有條件做吓。

今次碧桂園唔揀批盪而係供股，算係畀全體股東優先參與公司增資擴股的機會。雖然今次供股比例唔大，但小股東聽到公司要伸大手板，一般第一個反應都係唔多高興，昨日股價曾跌至3.36元，不出意外，惟已大概反映了供股因素。

阿里九月登場，理論上又可以關注下相關概念股，但指數遇阻回落，選概念股的同時，還是要多睇重基本因素，才能抵得住大市波動。同阿里合作搞物流業務的海爾電器（01169），前日公布中績賺9.78億元人仔，增18.9%。相比起近日公布中績的家電股如匯銀家電（01280）同國美電器（00493），盈利增幅係有點遜色。

阿里相關股要（目及）實

睇住當日海爾股價跌6%，昨日則反彈2%，收報21.95元。不過，其實海爾的銷售規模大得多，半年銷售額經已有329億元人仔，半年盈利實現雙位數增長，都唔簡單。反而古勝認為，海爾的渠道綜合服務業務收入穩定增長，將有助穩定收入來源，並提升整體毛利率，在這方面的成績，是其他家電股望塵莫及的。

到底阿里喜事近，相關股份會唔會乘機飛舞，要拭目以待，但即使純以基本因素及估值出發，海爾係值得中長線投資者捧場的大型消費類股份。

古勝