相信大家身邊唔少蘋果公司（Apple Inc.）粉絲都睇實下個月個發布會，如果盛傳嘅大「芒」iPhone真係現身，等到頸長嘅果迷實瞓身支持。不過，喺呢個時候，行政總裁庫克竟然減持公司股份，究竟新iPhone嘅表現係好定壞，投資者真係要識得睇路呀！
市場對新iPhone嘅期望，推動Apple股價近期節節上升，股價闖上新高之餘，亦帶挈行政總裁庫克先賺一筆，喺每股100美元以上出售一批股份套現近3,000萬美元（約2.34億港元）。
庫克呈交畀美國證交會嘅文件顯示，佢喺本月廿四日有56萬股有限制股份「解封」，轉手出售29.08萬股，售價為101.32美元。賣完股庫克手上仍然直接持有超過88萬股Apple，按周二收市價100.89美元計約值8,886萬美元（約6.93億港元）。
其實庫克套現前Apple股價先啱啱衝上100美元，係自六月拆細後首次，最高去到102.17美元。庫克喺出新機前減持Apple，未必同佢對股價嘅睇法有關，因為佢之前都試過為慳稅而售股。
余絲韻