期指觀瀾：未改候低再買策略
十個牛皮九個淡，恒指破24,988點後，先後挑戰過25,201點及25,243點，老實講，即使好似筆者對後市甚為樂觀，眼見指數升穿一個海嘯後大阻力位後，居然只再多兩三百點進帳，確實欠缺氣勢。
破位唔行可能性，有兩個：一是市場對撼淡友唔多；其次係現貨輪流炒，升市領頭羊中移（00941）、港交所（00388）早有力弱迹象，新領頭羊又唔夠力，造成個市升得有點拉牛上樹，加埋9日RSI三頂背馳顯示市底動力減弱，估唔到淡友在結算前夕已經發難，惟指數跌幅尚算溫和。
昨日恒指跌155點報24,918點，主板成交稍增至675億元，八月及九月期指日市收24,932點及24,868點，成交6.4萬及4.8萬張，九月合約較合理值24,818點高水50點。
昨日兩點半後現貨跌幅擴大期間，九月期指高水幅度（較合理值）一度擴大至接近120點，說明跌勢主要由現貨而非期貨沽盤帶動。其次是昨日午後的跌勢，並非出於九月好友轉倉積極性減低而引發。
今日結算，候低再買第二注的計劃依然有效，以24,190至25,243點短期升浪的0.618及0.5回吐，將以現貨指數回試24,841點及24,717點為未來兩注的入市觸發訊號。
John Mullen