絲絲講場：星展親子同樂家年華
銀行家工作喺好多人心目中都係一個謎，小朋友問嗲哋媽咪返工有咩搞作，解釋到口唇乾小朋友都仲未明，結果星展香港搞咗個嘉年華，小朋友着住銀行制服落場示範做「賓架」，CEO龐華毅（Sebastian）帶埋靚太太同兩個囝囝玩埋一份。
小賓架扮出納夠鬼馬
個遊戲係咁嘅，嘉年華入面有一間迷你分行，小賓架負責出納，有客人拎住本存摺嚟到，就要打印，跟住提錢畀客人（當然係用道具錢），啲錢之後就可以用嚟換禮物。雖然龐華毅囝囝冇着制服，但都玩到「嘩鬼叫」，場入面仲有魔術師同埋小丑，又可以跳跳吹氣城堡、吃即製爆谷、棉花糖，氹到小朋友開心晒。
CEO龐華毅一家撐場
星展香港奉行「5@5」政策，即係「星期五放五點」，今年主題係Kids@work，尋日兩點鐘開始已經有唔少員工可以同囝囝玩，龐華毅話，希望畀仔女感受下銀行工作環境同氣氛，仲可以加強親子溝通。
絲絲睇住龐華毅單手抱住好盞鬼嘅細B，隔籬企住靚到爆嘅老婆同大B，笑到鬼咁開心，一副模範家庭嘅模樣，真係羨煞旁人。
余絲韻