絲絲尋日聽芬佬講，債王格羅斯捉蟲，唔係啩，莫非佢管理嘅基金買錯邊要蝕錢？芬佬笑到反肚，佢話債王個辦公室真係有蟲患，要搵捉蟲專家出手呀。
吸血臭蟲入侵Pimco
格羅斯旗下嘅Pimco嘅紐約辦公室畀蟲蟲入侵，呢款叫吸血臭蟲嘅蟲蟲，原來一直肆虐紐約。Pimco發言人話，喺發現呢啲臭蟲之後，佢哋搵咗滅蟲專家，進行燻蒸滅蟲嘅行動。
另外，為咗保障員工嘅健康同維持公司嘅環境衞生，Pimco宣布所有員工都唔使返公司做嘢。嘩，咁好，咁咪好似放咗幾日假咁？Pimco員工應該封咗呢啲吸血臭蟲做英雄喇。
不過，發言人又話，今次嘅事件並唔罕見，紐約市一直都諗緊辦法同呢種吸血臭蟲搏鬥。其實受害嘅真係唔止Pimco，喺兩個禮拜前，紐約地鐵車廂入面都發現呢啲臭蟲嘅蹤影。
而喺四年前，Victoria Secret's位於曼哈頓嘅舖位都有同樣問題，甚至要暫停營業。睇嚟要杜絕呢種小昆蟲嘅出現，絕對唔係一件容易嘅事。
余絲韻