絲絲講場：淘寶大搞「自提點」聯盟

絲絲一向有「淘寶」，貪唔使出街都享受到購物嘅樂趣。但係成日要等集運送到屋企都幾麻煩，一來要約好時間等送貨；二來又要提供住址或者送去公司都唔方便。不過，香港淘寶網業務主管呂紹勇同絲絲講，下個星期就可以自選取貨地點，咁就有多個淘寶理由喇！

呂紹勇話，包括香港郵政在內嘅五個夥伴合作，設立超過200個「自提點」，就連離島都有得攞貨。

除咗香港郵政之外，「自提點」亦包括香港7-Eleven、順豐速運、中通快遞同埋遞四方速遞。下星期一開始，淘完寶可選擇喺「自提點」攞貨。呂紹勇同絲絲講，公司同五個夥伴嘅合作，中間唔涉及收入分成，新服務主要係提升香港消費者嘅網購體驗。

呂紹勇話過去香港市場有穩定增長，未來會繼續搵合作對象，包括考慮埋7-Eleven嘅對手OK便利店。佢又強調，淘寶會繼續打擊假貨。

余絲韻