湯漢斯唔單止係金像影帝，原來仲係個創意爆燈嘅應用程式（App）設計師！話說對懷舊打字機情有獨鍾、一九七八年起開始收藏打字機嘅湯漢斯，最近搵人合作出咗個叫「湯記打字機」（Hanx Writer）嘅iPad App，志在向公眾分享用老牌打字機嘅感覺，推出個幾星期已經成為iTunes最多人下載嘅App。
用戶打開「湯記」，就會見到部壓扁咗咁嘅打字機，打字會聽到懷舊打字機獨特嘅「叮叮」聲，以及需要換行時嘅提示。之但係，依家話晒係廿一世紀，「湯記」當然有與時並進，用戶打錯字番個以前冇嘅「Delete」掣就OK，亦都可以Save低份文件隨時印。
「湯記」個App本身免費，但如果各位想Set個心水打字聲，或者轉字型、顏色、風格，就要選購其餘3款「湯記」，盛惠2.99至4.99美元，但見到連小學二年班就用Mac機嘅小朋友都大讚，湯漢斯唔使憂冇人買啦。
其實依家喺歐美搞App競爭好大，萬一喺App Store之類主流平台無曝光率就等蝕錢，所以愈嚟愈多開發商打算靠名人發圍，「湯記」就係一個成功例子。不過，加拿大小天王Justin Bieber投資嘅自拍App「Shots」就頹得好快，唔知係咪同佢形象麻麻有關呢？
余絲韻