絲絲講場：雷士內鬥總部一開二

吳長江落台死守重慶

吳長江畀王冬雷罷免，條氣梗係唔順啦，拒絕讓位之餘，之前坐鎮喺重慶開記者會，同身在北京嘅王冬雷隔空駁火，罵戰相當燦爛。

雷士份公告就話，吳長江唔肯服從董事會嘅決定，又話佢嘅行動已經影響公司營運，今次決定暫停重慶公司嘅運作，仲改由惠州公司做臨時總部，好明顯係想削除吳長江嘅根據地，等佢再無作為啦！

王冬雷掌權搬竇惠州

罷免吳長江之後，雷士成立咗嗰緊急事務處理委員會，由王冬雷自己同另外兩名董事揸旗。公告話由於已經喺緊急事務狀態，呢個委員會開始行使人事任命、商業協議呢類咁重要嘅職權，連喺聯交所發布公司通告，都要由委員會做埋，總之大權都攬晒上身。

王冬雷今次出到呢招，唔知吳長江會點樣應對呢？話唔埋佢唔承認雷士總部搬竇，總之你有你話搬竇，我有我繼續喺重慶指手畫腳，公司停緊牌仲要咁搞法，小股東真係喊咁口！

余絲韻