Market Insight：汽車股接力炒上

昨日港股都幾悶局，無咗中移（00941）及兩桶油炒落後，挾住指數爆升，支撐大市繼續企住兩萬五樓上的重任，落喺地產股身上。恒隆地產（00101）、信置（00083）、九倉（00004）同恒地（00012）升幅介乎2.1至3.3%。話就話指數再創○八年以來收市新高，升36點報25,159點，但整體大市股份上升得690隻，少過705隻的下跌股份。

古勝昨日同班基金朋友傾開，以為近期大市浪接浪破頂，佢哋搵到真銀，點知情況啱啱相反，個個都話炒出炒入得個做字。一來今浪升的股票大部分都係過去幾年under weight得好緊要的重磅大市值股份，其次今浪特色係市場「口味」轉得好快，今個星期得，下個星期已經唔得，唔少主動基金及對沖基金芬佬都呻話今浪搵唔到食，畀老細詐型。

古勝冇點你2014/08/21

萬里長空

刺激經濟走回頭路

在下睇好後市，一來係從滬港通的演習，似乎阿爺呢鋪大龍鳳，一定好好睇睇收場；其次，近期確係愈來愈多迹象見到，北大人政策轉向的趨勢。習近平強勢登場初期，對經濟轉型，包括樓市調控及銀行流動性管理，擺出強硬姿態，但面對近日內地經濟真正有轉弱迹象，樓市漸見高處不勝寒，政策轉變之迅速也實在快得交關。

昨日提過，內地主要46個限購城市中，八成限購令鬆綁，只有個別較富庶的一線城市仍然執行。另外，內地拆息曾經飆升，人行話明懲戒銀行濫借情況，以免拖累銀行體系資產質素。不過，近日所見，隔夜上海銀行同業拆息昨日落到2.85厘，跌近24點子，是近半年來最大單日跌幅，拆息回落至近兩個月以來最低水平。在在可見，面對經濟下行壓力，北大人似準備走回頭路，流動性刺激投資的手影。

講番個市，依家仲有乜未炒，汽車股應該有得諗吓。昨日吉利汽車（00175）成績表一般，半年純利跌20.3%至11.13億元人仔，面對內地自主品牌市佔率流失，吉汽重塑旗下品牌，集中火力發展「吉利」，上半年業績唔得屬意料之內，半年銷售18.73萬輛，只及全年目標58萬輛的32%。高管接受現實，將全年銷量目標削減四分一去到43萬輛，比去年跌22%。

吉汽最壞時刻已過

吉汽的另一個打擊，是東歐的出口面對地緣政治不穩影響，上半年跌近32%至3.44萬輛，令首六個月汽車銷售錄得29%跌幅，較內地整體自主品牌市場15%銷量跌幅更大。

不過，買股票講未來唔係講歷史，吉汽有復甦故事，幾個主打車款，包括「新帝豪」中型轎車、「GX9」大型SUV及「GC9」大型轎車「KC」都喺下半年推出，以全年銷售目標43萬輛，減番上半年18.73萬輛，意味公司下半年估會賣到24.27萬輛，比上半年多近三成。睇佢昨日收市前拗腰倒升，最壞的半年業績出埋，短期應該有睇頭。

另外想一提隻華晨（01114），一早知德國寶馬在華收入急升，預咗份成績表超靚，結果半年賺36.28億元人仔，較去年大升78.7%。

上半年賣出14萬輛寶馬，以現時設計年產能力30萬輛，大致可以感受到產品有幾渴市，賣得相當好。華晨的賣點是一六年合營寶馬廠產能倍升至60萬輛，高管講明會引入寶馬2系、一款小型轎車及X3中國版，加上新晨動力（01148）開始供應國產N20寶馬引擎，有助降低成本。

中行估值具吸引力

德國血統的寶馬，在內地幾乎是銷量的保證，產能及內地部件比例又係半公開，華晨盈利增長可預測性其實頗高，過去估值一直比同業有溢價，好似一四年市盈率12.3倍，較吉汽及東風（00489）的8.5倍及8倍高近五成，但以37%的預期增長，PEG得0.33倍，可謂貴得有道理。

內銀股又進入中績期，中國銀行（03988）打響頭炮，公布中期純利同比增11%，表現符預期，期間海外業務表現理想成亮點。在人民幣持續推動國際化進程下，前景繼續向好。中行現價往績市帳率0.8倍，息率6厘，估值具吸引力，可視為內銀股中首選之列。

古勝