孖妹Ｓ檔案：學技術分析股市圖利

黃：敦沛證券副總裁黃志陽

黎：獨立股評人黎永良

港交所超買明顯 睇位再撈

國指連過兩關 睇高一線

恒指雙頂突破衝26500

黃：恒指近兩年嚟主要喺21,000至24,000點區間徘徊，大市上次回調係喺六月中下旬，調整唔深之餘仲高過之前低位，而且近期走勢保持喺20天線上，突破雙頂，可見走勢偏強。

敦沛證券 黃志陽	納指資金冷靜高位仍穩	獨立股評人 黎永良

24,000點係近三年嚟嘅大型阻力位，下一站可睇○八年港股直通車消息失效後嘅首個反彈浪高位，即企穩25,000點，如果穩破呢個位就「如入無人之境」，我預計滬港通一旦落實推行，加上資金持續流入，第四季恒指可衝上26,500點。

標指聰明錢沽貨未恐慌

滬綜指超賣反彈上望2480

彩兒回應

上星期五恒指一度升穿25,000點大關，可惜收市腳軟維持唔到，我同Kitty都有啲失望啊！

港交所 超買明顯 睇位再撈

黃：近期因滬港通效應而備受熱捧嘅港交所（00388）走勢凌厲，股份喺滬港通消息公布後出現技術走勢突破，預料佢表現會持續偏強，短期目標價185元（上周收報183.10元）。

不過，依家離市傳措施十月出台，只係相距個多月，股價已接近目標價，而且隨機指數（STC）已進入80以上嘅超買區，其他指標亦已出現背馳，可見調整風險幾高，我建議投資者待股價調整完畢，等穩守10日線，同時STC回落並企穩50至60水平才入市。

Kitty回應

我班「閨密」個個都成日問我港交所幾時入得過，等我（目及）實啲技術指標提佢地入市先，費事一陣連姊妹都冇得做啊！

國指 連過兩關 睇高一線

黃：國指過去幾年受A股弱勢拖累，一直跑輸恒指，但近日已突破「宿命」，明顯跑贏環球市場。A股爆發帶挈國指今個月上旬出現小突破，升穿舊年二月及十二月嘅兩個高位，而且喺20日線有較強支持，成交配合升勢，仲冇同STC及RSI（相對強弱指數）等指標出現背馳，可睇高一線，有望追落後。由於中資股估值偏低，相信可繼續支持升勢，短期目標11,600點，全年目標12,500點。

彩兒回應

國指終於都生性喇，啲「中字派」股友今次還得神落喇。

納指 資金冷靜高位仍穩

黎：乘科網熱起舞嘅納指，年內升近7%，但出現泡沫爆破嘅機會不大，短線嚟講，目前資金流動比率處約55水平，屬中性；雖然隨機指數與威廉比率均現超買，指數或回吐，但MACD卻現預期升市訊號，在訊號不一致下，股友都係唔好入市住。長線而言，指數於3,700點（500天線）具支持。

不過，有唔少科網股估值過高，尤其facebook（美股：fb），所以真係買A股好過。

Kitty回應

咦？唔通A股ETF仲入得過？

標指 聰明錢沽貨未恐慌

黎：美國收水引起投資者對股市泡沫爆破嘅憂慮，我依家肯定唔會買美股，標指即使突破2,000點關口，升幅一定有限，主因好多「聰明」基金喺七月尾嘅1,970點水平已開始沽貨，預計資金將逐步流向新興市場，指數走勢會逐步回落，但如果可企穩於500日線，即1,670點以上尚算安全。

另參考VIX指數（恐慌指數）走勢，○八年美國雷曼事件發生時，VIX指數一度彈升至80水平，之但係就算係今年初市場憂慮美國聯儲局收水時，指數都只不過升到21左右，近期更回落至15以下，屬於健康狀況，表示市場氣氛輕鬆。

彩兒回應

啲人講到美股泡沫爆破似層層咁，我半夜扎醒都會望吓美市走勢點o架。

滬綜指 超賣反彈上望2480

黎：滬綜指近期表現好靚仔，佢喺六月中下旬展現嚴重超賣，之後喺資金流動指數、MACD及威廉比率等指標都見到買入訊號，正因內地屬半封閉市場，所以部分資金轉由投資本港嘅相關股份，如A股ETF（交易所買賣基金）流入內地市場。

喺內地經濟結構重整後，經濟數據見好轉，外資喺四月起已開始平A股沽空盤，買入國策股，同時因應滬港通措施買入大折讓嘅H股，我預期今年滬綜指可上望2,480點，而AH概念股仲有得炒！

Kitty回應

嘩！彩兒你之前低價買落咁多大折讓嘅H股，食胡後不如資助吓我呢個可憐少女嘅生活費啦……（彩兒：你就想！）

彩兒 Kitty

若有料報畀彩兒同Kitty或有嘢問，可電郵money.biz@on.cc