昔日嘅「體操王子」李寧，尋日交代李寧（02331）今年上半年業績時，心情認真麻麻，除咗公司業績繼續見紅之外，可能同失卻合作多年嘅中國體操隊贊助大有關係。李寧不禁自動抒懷，直言主動放棄贊助國家體操隊，對他個人而言係「痛苦」嘅決定。
雖然上星期李寧公司已清楚表示，唔再贊助中國體操隊主要係市場經營戰略之一，但執行主席兼品牌創辦人李寧尋日親自現身說法自然更具說服力。
佢都話，呢個決定係基於將有限嘅資源投入五大核心品類等，不過講到尾「體操王子」都係凡人一個，所以佢坦言自己承受好大壓力，因自己係體操出身，「體操培養了我，是生命的一部分」，但公司轉型不得不做此決定，甚有「完成大我」精神。
李寧強調，未來仍會持續關注體操。反觀李寧公司執行副主席金珍君就理性得多，佢都知今次有關體操隊贊助嘅決定，對「體操王子」而言充滿感情。不過，佢認為此舉正正代表公司徹底轉型嘅決心。睇嚟四年後，李寧同體操隊能否再續前緣，都要等公司轉咗型先講。
余絲韻