今年雙春兼潤月，絲絲身邊都有唔少喜事，啱啱又八到恒發洋參（00911）老闆「洋參大王」楊永仁將會喺今年年底嫁女啦！咪就係之前上市時，捧場嗰位靚女千金Karen，真係恭喜晒！楊生今年成功將恒發洋參上市，嚟緊仲會嫁女，真係雙喜臨門喇！
絲絲記得喺恒發洋參上市嗰時，無論係記者會定係投資者推介會，Karen都有出席撐老竇場，之不過到上市當日，就竟然無去到上市儀式，絲絲都有啲唔明，不過聽講原來嗰陣時佢去咗影結婚相呀，仲遠赴西班牙影添，唔知有無喺鬥牛場取景呢？據聞仲會喺今年年底就會拉埋天窗，究竟邊個咁有福，娶到26歲嘅Karen呢？
聽講Karen會喺君悅擺酒，唔知到時楊生會唔會指定用番恒發啲參茸海味，話晒私伙嘢梗係夠晒足料，楊生又咁講究，分分鐘拎埋鎮店之寶大宴親朋，嫁女咁大件喜事喎，賓客有福喇！
余絲韻