滙控（00005）薪酬新制度落實，15個高層合共袋咗逾700萬英鎊股份作為花紅。根據滙控公布資料，幫公司搵錢最多嘅始終都係炒房，即係環球銀行及資本市場業務（GBM）部門行政總裁安思明，其次先係行政總裁歐智華，至於主席范智廉就無份。
絲絲記得滙控今年開始引入固定薪金津貼，即係每季用股票形式支付畀管理層，補貼番歐盟花紅限制嘅影響，獲派股份嘅管理層要扣咗稅先，下年三月可以先袋兩成股票獎勵，二○二○年先可以袋埋剩低嗰八成。
至於獲發花紅最多三人中，安思明獲發150萬英鎊滙控股份最勁，歐智華緊隨其後，獲發84.8萬英鎊股份，排第三已經到亞太區行政總裁王冬勝（Peter），獲派約76萬英鎊股份，話晒負責亞太區嘅滙豐核心盈利年年創新高，論跑數戰績都算合理。
不過呢排滙控官司纏身嘅情況未見顯著改善，應該有唔少維權股東都想知究竟有無影響管理層花紅，彭博社報道話，滙控啱啱先係巴西一單集體訴訟甩身，因為巴西有152個員工請假，滙控竟然請偵探監察員工私人生活，之前曾經因為咁而被罰款6,750萬雷亞爾（2.29億港元）。
但今次當地法院就認為員工應該獨立作出訴訟，令滙控甩身。
余絲韻