孖妹Ｓ檔案：大市高危齊學做空軍

借貨沽空最重要轉身快

葉：致富證券投資銷售部董事 葉海亞

Kitty：我哋平時炒股梗係想低買高沽賺番啲置裝費，究竟借貨沽空玩法又有乜唔同？

葉：借貨沽空旨在喺高位借貨沽出，再候低位買回還貨，希望趁大市或個別股份暴跌賺取價差。普遍而言，投資者須付25%貨值按金，就可用約四倍槓桿開倉，坊間券商最低總貨值要求大約係10萬元。如希望沽空價值100萬元嘅股份，就要繳付25萬元按金，不過券商多數對沽空者資產並無明文規定。另外，除非借出者要求收回股票，否則唔受到期日影響。

跟足規矩 勿無貨沽空

彩兒：「做空軍」有乜規矩要跟？

葉：根據交易所規則，小投資者同大戶做法相同，須先向交易所說明係沽空，而且沽空價須不低於或相等於賣方價格，最重要是不可進行無貨沽空。沽空選擇方面，港交所（00388）現時准許沽空嘅股份及ETF約有700隻，呢批股份市值及流通性均達指定要求，當中近期熱門選擇為安碩A50中國（02823）、本地地產股，仲有騰訊（00700）等等。

Kitty：不如你拎啲近排「至Hit」嘅例子教我哋點沽啦！

葉：咁就用沽空A股ETF安碩A50中國（02823）做例子啦！如果喺9.5元沽空100手共一萬股股份，最少畀23,750元按金就可開倉。雖然睇錯市或者需要補倉，但沽空睇市食飯，精髓係捕捉股份或大市暴跌嘅一刻，所以建議投資者一旦捉錯路就要轉身夠快，平倉走人，記住唔好死守啊。

彩兒：借貨沽空呢啲高Level玩意，交易費會唔會好乸脷？

葉：唔使擔心，「做空軍」嘅成本同一般股票買賣差唔多，同樣要畀印花稅、交易所徵費、結算所費用及證券行交易佣金等，唯一額外支出係借貨成本，即借貨息率。以致富證券嘅年息嚟講，一般盤源較大嘅藍籌股，好似中移（00941）、工行（01398）及騰訊嘅借貨年息約5厘，但係一啲無論流通量及公眾持股比例都低啲嘅冷門股，券商進行借貨難度會因而提升，所以息口都會相應提高，年息可達8至9厘。

策略篇

講明係「空軍突襲」就梗係睇準時機先做嘢啦！其實當中有唔少秘技可令投資者增添勝算，致富葉海亞已經親自傳授咗唔少貼士畀孖妹，大家仲唔快啲偷師！

秘技一：投資者普遍造淡主要有三個誘因：投資者通常因為睇淡快將公布業績公司嘅成績表，預期股價有大跌空間而做定嘢。其次係有利淡消息出現，好似內地有調控樓市政策出台，而沽空內房股。第三係純粹個人判斷，搵超買股份去博向下調整。舉例講，騰訊（00700）拆細股份前，股價一度由500元水平爆升至600元樓上，期間單日波幅可達30元左右，當時唔少沽空者看準機會入市，即日已可平倉。

秘技二：近期大市突破新高，仲強勢過美股，有超過100隻股份突破五十二周新高，明顯已衝破蟹貨區，尤其係早前處於悶局嘅本地銀行及內銀股亦見爆升，投資者不宜喺旺市進行沽空操作博調整。反而早前嘅「靜市奇葩」中石油（00857）與中石化（00386）就喺波動市進入調整期，所以希望造淡「搵食」可以考慮吓。

秘技三：沽空旨在暴跌期間捕捉利潤，雖然借貨有利息支出，年息利率一般係5至10厘，一般沽空者持倉通常少於一星期，即使持貨一個月嘅成本都係1厘有找，如果估中方向就大機會有利可圖。不過，沽空者需有好強嘅止蝕意識，原因係喺波動市進行沽空，一旦睇錯市，升勢亦會異常迅速，所以沽貨前應先設定止蝕位，一見估錯方向就要即時轉身平倉，以控制風險。

秘技四：借貨沽空槓桿約四倍，相比輪證、期指及期權等造淡工具嚟講，風險仲可控，建議新手可揀波幅較大嘅股份，主因獲利空間大啲，都容易捕捉跌勢啲。選股方面，可吼早前「炒過龍」嘅股份，特別係單靠概念炒作、未有實際業績支持嘅高估值股份，好似部分科技、網遊、環保及網上博彩板塊。

衍品槓桿高須訂止蝕位

潘：駿溢期貨董事總經理 潘國華

彩兒：以我所知，除咗借貨沽空之外，投資者仲可以用沽期指、認沽期權長倉，買認沽輪或熊證等方法造淡。

潘：係啊！呢啲產品按金比例或入場費普遍比借貨沽空低，不過槓桿效應一般會提高，投資者需要更審慎控制風險。對初學者而言，沽期指是看淡大市較便宜、直接及簡單嘅造淡方法。一張期指按金約九萬元，而來回交易費僅約123元。

確認跌勢先好落盤

Kitty： 玩期指同期權高唔高風險？

潘：期權中嘅認購短倉（Short Call）亦係睇淡正股策略之一，旨在收期權金（Premium），但正股上升時有機會輸掉期權金，沽期指同做Short Call都有補倉嘅可能性，並有無限風險，至於期權中嘅認沽長倉（Long Put）最大虧損就只係期權金。投資者一定要訂立止蝕位，初學者只宜動用一成以內投資資金牛刀小試，去熟習環境，千祈唔好搞到輸身家啊！

彩兒：可唔可以過兩招，等我哋刀仔鋸大樹？

潘：喺期權世界入面，愈價內、愈遠期嘅合約愈貴，投資者一般投資現貨月合約。我建議初學者可考慮喺大市衝高之後、並出現50至100點跌幅先落盤，或者參考技術分析嘅阻力位行事，食盡頭啖湯，但係記住一定唔好心急，必定要確認跌勢、有把握先好落盤。更穩健嘅做法係等大市連挫兩日，跌得更深先落盤，不過賺取嘅期權金就梗係冇咁多啦！

彩兒 Kitty

若有料報畀彩兒同Kitty或有嘢問，可電郵money.biz@on.cc