絲絲講場：黃書耀離開輪場抖一抖

Warren前晚喺佢嘅facebook，隱約咁同大家「告別」，仲話要「讓我們互相祝福」。絲絲尋日幾經辛苦搵到Warren，佢先話自己離開美林，恢復「自由身」。不過，佢就唔肯答關於美林嘅問題，又話暫未有大計，可能要抖一排，仲同絲絲講：「心情愉快，有緣再聚。」

睇番美林旗下嘅產品，原來有38隻零街貨窩輪喺尋日起暫停買賣，依家等緊相關窩輪嘅除牌申請獲審批。美銀美林發言人話，呢批窩輪喺停牌之前冇任何街貨，所以對散戶冇影響。依家該行喺市場上仲有123隻窩輪，但就唔評論係唔係淡出輪場。資料顯示，美林喺上月七號之後，冇再發行新嘅窩輪。

法巴葉偉林傳跳槽

瑞銀亞洲股票衍生產品銷售部董事總經理于正人（Johnny）話，資料顯示，齋睇年頭至今，頭三位發行商嘅產品已經佔市場成交超過四成，相反美林嘅輪證成交佔約3%，尋日仲急跌至1.3%左右。

另外，法巴都有人事變動，原來法巴上市衍生產品部董事葉偉林已遞信請辭。市傳佢會喺九月或十月，過檔另一間投行做衍生工具工作，但據聞同輪證冇關喎。

余絲韻