絲絲講場：黑莓防竊聽默克爾勁Buy
德國總理默克爾早排飽受竊聽之苦，最近佢就換咗部新款嘅黑莓智能手機。黑莓手機過往係唔少公司派畀員工嘅聯絡工具，聲稱較保密，不過近年iPhone當道，搞到黑莓日漸畀人遺忘，就連奧巴馬政府都話要棄用佢哋。
默克爾早前畀美國竊聽一肚氣，大聲話「監聽盟友要不得」！但警告無乜效用，德國內政部宣布黑莓係唯一符合佢哋安全嘅標準手機，推薦更多政府官員使用。
Secusmart技術貴過手機
發言人Tobias Plate話，部門買入咗三千部新款黑莓智能手機，兼且做埋加密手腳，而且仲用埋德國公司Secusmart技術。
Secusmart會喺手機插入專門microSD卡，將機密訊息單獨存喺卡上，希望減低竊聽風險。不過，加密代價認真不菲，一套要成2,000歐元，即係超過兩萬港元，仲貴過一部手機。
不過，一般商業機構都係以員工愛好為先，好似美國福特汽車就啱啱宣布，話明年會向六千多名員工派發iPhone，以取代依家嘅黑莓手機，仲話夠安全，亦符合業務及員工生活需求添！
余絲韻