Market Insight：磚頭股估值仍偏低

睇番過去幾日唔單止港股勁，滬綜指由2,050點炒到上昨日高位2,193點，六日升6.9%，連帶人民幣匯價上返6.18，是三月中以來最高，A股ETF安碩A50（02823），由五月最差時折讓0.31%，去到昨日反而有4.18%溢價，在在可見，今浪熱錢湧入中港兩地股市，相當之全面。

今浪升市資金主要熱捧一些過去兩年，股價走勢悶到發荒，估值又夠低殘的重磅股份，如內銀、內險及內房股等，反之上半年一直跑贏大市的增長股，或政策支持的中資股份，例如燃氣、環保基建、醫藥及汽車股，慘變基金提款換貨對象，享受唔到升市不特止，唔少仲逆市向下。

今浪升市未有耐完

綜合股份升跌比例由六連升之初的66對34，逐日回落去到昨日幾近五五比。經驗告知升市愈近尾聲，資金亂石投林往往造成升勢由一線股，變成二、三、四線股帶動，今次愈升，基金選擇一直維持高度集中在重磅股身上，除咗今鋪升市未有耐玩完外，真係諗唔到其他更合理解釋。睇嚟就算超買的港股在結算前抖一抖，看官都唔好隨便估頂做淡。

古勝冇點你

萬里長空

過去年多，大行清一色睇淡香港樓市，理由係政府辣招，配合美國加息預期，認為港樓難逃一跌，估跌一成算樂觀，有些更估兩三年內跌五成。但早前特區政府修訂DSD細節，被視作辣度見頂，近排中細價樓升浪再現，大行都不能不向現實低頭，轉晒口風。從中證實兩點：一是資本主義社會上，政府干預愈多，市場愈畸形；二是分析員唔係先知，尤其對大環境好似股市指數、樓價走向等預測，同普羅大眾一樣，往往是錯得離譜。

套用男神黃子華金句：「搵食啫！」今日唔少外資行的地產股分析員都僅僅三十出頭，九七樓災時仲讀緊書未畢業，選擇信佢，其實自己多少都有責任。反而掌握香港金融命脈的財爺曾俊華，金管局第一把交椅陳德霖，近幾年幾次公開講話，都指樓市位高勢危，萬一信到十足十，幾年前有能力但延後置業，恐怕恨錯難返。

發力追回樓價升幅

在下不止一次提過，香港樓價處歷史高位，相對本地地產股，大都同○七年高位有段距離，若非樓市錯價，地產股終會追落後，昨日本地幾隻主要地產股全部創今年新高，但依然遠低於重估後每股價值，隨着睇淡樓市聲音愈來愈細，地產股追落後相信可維持一段時間。

最平選擇，當然係今年供股供到古靈精怪，股價大落後的新世界（00017）。正路之選可留意明日出中期業績的長實（00001），近期荃灣及大埔兩個新盤環宇海灣及嵐山，一個低於同區二手樓價，一個177呎迷你單位，市場有noise亦去得快，今年賣樓收入有保證，只嫌過去幾日升得急，若落返140元邊，可以諗。

早前魚缸每日得四百幾億成交時，手機股耐唔耐就炒一轉，點知在近期大升市，呢類股反而好似漏氣汽球。最典型例子係隻酷派（02369），昨日恒指又升兩百點，但該股股價卻逆市向下，收跌5.5%，大升市手持股份升得少都係罪，揸着呢隻股都咪話唔閉翳。

手機股競爭白熱化

睇番酷派幅走勢圖，本月上旬升至2.15元後便止步，上周展開跌勢，短線若未能收復50日線2元關，向下250日線處1.75元。觸發昨日沽壓湧現，其中一個原因係高盛將之從亞太區確信買入名單中剔除，評級降至「中性」，理由之一係在4G智能手機銷售或低於預期下，相信其產品周期可能會顯著放緩。

今年各大本土手機品牌在4G智能手機市場中惡鬥，確有心理準備係要以利潤換取銷量同佔有率。製造商要突圍而出，必須優化產品組合，始有望殺出一條血路，問鼎王者之位。從這個角度看，兼營手機、個人電腦及平板電腦的聯想（00992），會較主力做手機業務的酷派，更具競爭優勢。

股仔繼續各自各精彩，轉型搞賭船的中國伽瑪（00164）現正進行供股集資拓展業務，大股東近日有增持行動，反映對公司前景的看法正面，不妨密切留意，但緊記轉身要靈活。

古勝