絲絲講場：滙豐15年重奪「最佳」
《歐洲貨幣》雜誌（Euromoney）日前公布「2014年卓越大獎」，滙豐銀行勇奪五個獎項，包括業界頗為重視嘅「亞洲最佳銀行」。絲絲聽聞滙豐上下都好開心，因為佢哋對上一次攞到呢個獎項，已經要數到一九九九年，即係十五年前嘅事。
中銀香港雙喜臨門
上星期Euromoney喺香港舉行頒獎禮，滙豐銀行副主席兼行政總裁王冬勝，以及多名管理層都有出席，以示支持。
除咗獲獎，滙豐嘅策略得到認同，相信亦令佢哋加倍高興，因為Euromoney講明，滙豐喺環球銀行及資本市場（GBM）同埋工商金融業務（CMB）之間嘅通力合作，係贏得獎項嘅關鍵。
除咗滙豐，中銀香港（02388）亦雙喜臨門，獲《亞洲銀行及財金》雜誌頒發「香港最佳本地現金管理銀行」，仲連續兩年獲《亞洲銀行家》雜誌頒發「香港區最佳現金管理銀行成就大獎」。
余絲韻