交易員因為違規交易被罰就聽得多，倫敦金屬交易所（LME）最近竟然因為交易員企咗起身，而處罰交易員，認真離奇。原來，LME內名為交易圈（The Ring）嘅交易大堂，規定交易員必須坐喺一圈紅色座位上進行交易，但有九名交易員喺進行銅交易時犯規，結果合共被罰款1.375萬英鎊（約18.3萬港元）。
LME係歐洲最後一個採取公開喊價形式嘅交易所，呢種交易方式已有過百年歷史，而且規矩多多，例如參與嘅交易員必須穿西裝繫領帶，及穿上深色皮鞋，就連用手機、飲嘢同食嘢都唔畀，交易所內亦禁止嚼香口膠。
「坐唔定」嘅交易員中，七人被罰款各1,250英鎊（約1.65萬港元），另兩人因三到六個月內第二度犯規而遭到加碼罰款各2,500英鎊，其中一人仲因為「重複犯錯」而被暫時禁止交易添。LME嘅發言人就話，交易員企起身會造成不公平優勢，可能阻礙其他交易員以及LME定價委員會成員嘅視線。
其實，喺實際運作時，圈內交易員經常站立喊價，急到身體傾前、面紅耳熱嘅場面亦都唔少，但必須有一隻腳跟緊貼座位。今次LME少有地處罰，聽講係因為有一名交易員喺緊張關頭離開座位，結果引發集體犯規。
余絲韻