絲絲講場：陳秉強婦唱夫隨 唔等滬港通
港交所（00388）尋日又再有高層人事變動，「滬港通」主將之一嘅陳秉強以家庭理由提出辭職，將會喺九月二十日正式離職。係人都知「滬港通」要十月先出台，換句話講，陳秉強咪等唔切佢個Baby「滬港通」出世就離開港交所？真係有啲可惜。
九月離職遷居日內瓦
咁陳秉強點解要走得咁急呀？絲絲聽聞，佢位太座係公務員，將要調到瑞士日內瓦工作幾年，所以陳秉強要舉家搬過去日內瓦住。由於係工作關係，冇得話等到「滬港通」出咗台至走。不過，港交所大派定心丸，話佢離任前會繼續參與「滬港通」工作，大家唔使擔心！
其實陳秉強唔撈嘅消息一啲都唔意外，今年四月，市場就傳出佢辭職，但獲行政總裁李小加挽留，同意做到九月底。
當時市傳佢由十月一日起放九個月無薪假，放完假後可能重返工作崗位。但根據昨日嘅講法，佢嘅請辭已獲港交所接納，佢會正式離職。
李國強「瓣瓣掂」接棒易
咁邊個接替陳秉強呀？就係「老臣子」之一嘅李國強，佢將會出任新設嘅市場營運分科主管，負責現貨交易、衍生產品交易同市場數據。李國強將會向環球市場聯席主管羅力匯報。
李國強喺港交所差唔多「瓣瓣掂」，曾經出任多個部門要職，好似現貨市場部主管、資訊技術聯席主管、同上市營運事務部主管等。
至於另一個分科係業務發展，依家就由俞泰碩任署理主管，負責定息產品及貨幣、同客戶業務發展，好似係上市推廣等等。
余絲韻