期指觀瀾：確認破頂唔急食胡
等運到等咗兩星期，終於有收成，昨日港股由頭挾到尾，恒指升394點報23,782點，創今年新高，亦升穿23,626點的阻力，主板成交717億元。
上周二中國第二季GDP超額完成佢唔升，周四有馬航突發事件，周五跌得唔多，周一復市的港股依然故我，到昨日遲來的升市，無謂事後孔明。
中線恒指由去年底高位24,111點跌至21,137點見底，0.764的終極阻力在23,409點，近期指數在此水平折騰多時，相信是等待突破時刻出現，一直維持手上好倉，希望以時間換取較大利潤，看來向着收成之日又行近一步。
即月期指日市收23,789點，收市計，由前日較合理值低水61點變高水1點，成交7萬張，同現貨成交有足夠說服力，確認了昨日的破頂。恒指下一站目標當然是24,111點，在港匯強勢，加上憧憬滬港通開車前夕，好友不把握機會，更待何時？
到底下半年可以升幾多，睇番過去三年，恒指低位有一浪高於一浪之勢，16,170點、18,056點、19,426點，其中過去兩年都是先低後高，指數高低位相差逾4,000點，假如21,137點是今年低位，大市又交出過去兩年波幅，由今日到年底，有機會見25,810點。
John Mullen