Market Insight：龍頭水泥股最值博

上周四馬航事件美股急跌後反彈，港股唔跟，昨日至肯追，對於早已睇好滬港通前港股的古勝，可算意料之外，又係估計之中。七月期指7萬張高成交，是本月轉倉後最高，主板成交717億元，亦係滬港通消息曝光後，第二高紀錄，令到昨日大市技術突破的可信性，高咗唔少，相信挑戰24,111點之日不遠矣。

市場傳溫州取消限購令，內房股表現標青，世茂房地產（00813）升4.7%、中國海外（00688）升4.3%、華潤置地（01109）升3.1%。如傳言屬實，溫州會係內地第一個大城市撤出樓市調控措施，但係值唔值得咁高興則見仁見智。近日多個城市的地方政府，眼見四、五月內地樓市成交萎縮，憂慮斷了地方賣地收入的米路，都各自擱置限購令的執行，中央又隻眼開隻眼閉，已經被視為調控措施轉向先兆。

古勝冇點你2014/07/23

萬里長空

內房股中海作首選

唔講可能唔知，溫州算係全國之中樓市最先爆煲的城市，全球70大中城市中，唯一一個自一一年八月到今日，住宅銷售價格按月跌足34個月的城市，就算阿爺出手救佢都係預料中事。在下維持建議，仲係揀頭六個月銷售數字已經過全年目標一半，嚟緊七、八月無劈價賣樓壓力的中海作首選。

全球最大豬肉食品企業萬洲國際，四月尾上市撻Q，外電報道即將捲土重來，初步定價每股6.2元，同四月時招股價8至11.25元比較，減價幅度介乎22.5至44.8%。預計將發行25.6億股，同四月時的36.55億股相比少三成，集資額約156.7億元，比上次預計的292億至411億元，減少46至62%。

萬洲肯大平賣，同舊年收購美國史密斯菲爾德令負債上升有關，唔少人估高盛及美國CDH等舊股東都傾向挾佢上橋，等佢哋嘅投資可以退場。傳聞中招股市盈率11.5倍，遠比第一次招股時的15至20.8倍低，同萬洲收購史密斯菲爾德前，後者約10倍的估值差唔多，估計會較易被大孖沙接受。上次動用咗29間保薦人都搞唔掂，今次大割價頂硬上，本來古勝唔多睇好，但近期港股氣氛唔錯，應該幫到萬洲。

海螺盈利大幅改善

諗住趁市靜，揀隻平平哋的中通服（00552），點知遇正大升市，個個炒其他有故事的股份，中通服昨跌1.8%收市，股市最悲痛莫過於大升市無份！

睇內房股炒限購令炒得咁高興，打算睇番早排先輪住出盈喜的水泥股。第二季內地樓市滯銷，加上傳統七月又係水泥淡季，近排水泥價格拾級向下，七月華東及華南水泥價差不多返到去年第三季水平。

不過，好似龍頭海螺水泥（00914），股價由四月初的35.7元，跌到落五月的25.8元，累積跌兩成七之後，近排見股價已搵到支持，昨升3.1%收報29.2元。海螺已發盈喜，預告上半年盈利大升九成，證實儘管第二季水泥價格雖然已級級落，但銷售額的增長及煤價等原材料成本持續低企，海螺仲係立於不敗之地，估計今年半年盈利至少有58億元人仔，相當於綜合大行全年預測121億元的四成八。

受雨季影響，延遲海螺產品覆蓋地區需求，大行估跌了大半年的水泥價格有機會在八、九月見底回升，看來全年達標的機會唔細。以10.3倍PE，同過去五年平均15.1倍比較，只得三分二，30元樓下睇嚟都博得過，基金要追水泥股，相信都會先揀龍頭。

雲遊捧場客受教訓

名字好緊要，人如是，公司亦如是。去年末季科網股掀炒作熱潮，雲遊（00484）在舊年十月上市，名字予人聯想到科網無遠弗界，網民可透過網絡「雲遊」四方，企業有想像、敢創新，為股東創造財富，實現夢想。當時雲遊以招股價51元上市，唔少人都睇得好好，話坐貨可以博倍升。

點知掛牌第三個交易日已見高位73.95元，之後反覆回落，今年首季股價失守50元，當時識得斬纜的捧場客還不多，至上周公司發盈警，小股東夢醒不再「雲遊」，但驚覺股價又唔見一大截。

昨該股低見20元後終於隨大市反彈，全日高位22.4元，收報21.7元，升3.58%。落到呢啲價，真係斬又慘唔斬又慘。仍然坐貨者，惟有寄望今次唔係「死貓彈」，至少在季內阿里上市前，仲會有一次落車機會。

古勝