「商品大王」羅傑斯近日收到《朝鮮日報》一位記者嘅來電，記者提到韓國新鮮熱辣提出一項新政策，羅傑斯第一個反應喺：「我要快快掛電話，因為要馬上分析及買韓股。」
事緣韓國新任經濟副總理崔靈煥喺就職儀式上，講到韓國財閥手握龐大嘅現金，唔向股東提高派息之餘，又唔識喺市場尋找投資機會，於是提出新政策，鼓勵財團提高股息兼將部分錢投入市場。據悉，十大財閥加埋囤積現金達到104萬億韓圜（約7,800億港元），其中三星佔咗一半，如果攞一半出嚟炒股，市場即時水浸啦。
嗰位記者致電羅傑斯，點知佢咁盞鬼，話要盡快收線買韓股。按羅傑斯分析，提高股息及將錢投入市場，將會令韓股急升，過往韓股被低估的現象將徹底消失，韓股往後不再是便宜貨。換言之，有買趁快啦。
據報道估計，羅斯傑擁有3億美元財產，講到投資觸覺，佢一定夠前瞻，不過講到市場資訊，記者有時仲快過專家！
余絲韻