高盛前炒手施家文（Morgan Sze）創立嘅對沖基金Azentus資本管理，當年一度成為「吸金王」，但今年表現認真麻麻，旗下一隻多元策略基金第二季扣減費用後回報為2.29%，但未能抵銷首季大跌超過5%嘅頹勢，總結上半年仍蝕3.28%，跑輸MSCI亞洲（不包括日本）股票指數同期升3.1%嘅表現。
睇番第一季，科技股同日本股市驟現拋售潮。到第二季，Azentus喺大中華市場股票投資有斬獲，令回報好轉，好似舊年年底買入嘅和黃（00013），股價上季就急升咗10%。
不過，截至六月底，Azentus管理資產約7.5億美元，同當年高峰時近20億美元「無得比」。
其實，唔少高盛坐盤交易員另起爐灶嘅表現都唔及得喺舊東家操盤時亮眼，好似私募基金KKR一○年請咗高盛前美股及信貸坐盤交易主管霍華德幫手，但霍華德管理嘅對沖基金成立後一年回報遜於大市，最終於今年五月底結束；由兩位前高盛操盤人創立嘅對沖基金Benros去年亦因為最大投資者撤資而關閉。
余絲韻