阿里巴巴喺美國上市進行得如火如荼，尋日喺內地爆出阿里被敲詐！有機構睇中上市前緘默期呢個空窗期，向阿里開出以30萬美元嚟換取買斷負面研究報告嘅敲詐。面對呢啲違法行為，阿里又點會坐以待斃，已經喺星期一將事件向杭州警方報案。
市場對阿里巴巴喺美國上市等到頸都長埋，喺呢個時間竟然有機構想趁阿里上市前「撈一筆」，要求公司用30萬美元買斷某啲內地周刊及媒體人士針對公司嘅負面研究報告。面對呢啲不法行為，阿里已經報警處理，尋日亦都發公告披露事件，仲話已經將相關資料移交警方處理。
阿里喺公告入面提到，尊重每一社會成員理性客觀表達自己觀點，亦珍視各界對阿里及中國電子商務嘅關注。不過，喺公告尾段時，阿里就重申立場話面對毫無根據嘅指控同輿論脅迫時，絕唔會啞忍同退讓。
講番單好消息，尋日有市場放風話，阿里會喺今個月22號聯同中國銀行及招商銀行等七間銀行推出全新嘅B2B互聯網金融產品。消息人士話，新產品係阿里「網商貸」嘅高級版，主要嘅服務對象喺中小企，解決貸款困難嘅問題。
講開又講，市傳阿里會將上市時間推遲到九月之後，兼且為免重演美股facebook掛牌慘跌，外媒綜合五名分析員平均估計阿里會調整上市估值為1,540億美元，同佢哋原先估計阿里上市後市值1,980億美元相比，折成22%，等佢有得炒，咁創辦人馬雲先有面吧！
余絲韻