想同股神巴菲特食個Lunch，唯一方法係使番千幾萬銀港紙，競投慈善午餐先得，但合照就應該唔使錢。
股神禮拜日畀人發現同前披頭四樂隊成員保羅麥卡尼，喺內布拉斯加州奧馬哈市，即係巴郡基地行街，少年懷特（Tom White）撞到佢哋兩個坐喺街邊長櫈度吹水，即刻拎手機自拍，擺上Instagram同Twitter，張相迅速喺網上瘋傳。
懷特隨行嘅朋友Luke透露，保羅麥卡尼個保鏢同佢哋講影幾多張相都得，不過簽名或握手就冇得傾。
股神同披頭保羅出巡，張相喺Instagram有成3,000幾人Like都好正常，不過絲絲覺得影得實在麻麻，一來咁疏離，二來股神都冇望鏡頭，到底係懷特出其不意影人，定係少年懷特太年輕，唔知保羅麥卡尼身邊嗰位係邊個呢？
其實見到兩位大人物同行嘅人仲有大把，有啲索性走過去要求合照，睇嚟佢哋都來者不拒，真係一啲架子都冇。
至於佢哋當日點解一齊，原來保羅麥卡尼前晚喺距離奧馬哈約一個鐘車程嘅林肯市開個唱，所以早一晚專程去拜會股神，連埋股神囡囡Susan等一行五人，喺間叫Avoli嘅意大利餐廳食咗兩個半鐘晚飯，之後仲去埋雪糕店eCreamery歎咗個據稱係冠絕巴郡所在地嘅雲呢拿甜筒添。
余絲韻