匯海策略：逆勢沽鎊宜小注
昨晚美國聯儲局主席耶倫發言前，匯市缺乏驚喜，故今日再同大家講多少少債市資料。按彭博資料顯示，美國財政部今年共發行1.12萬億美元債券，超額認購3.06倍，不單高於去年全年的2.88倍，亦是歷史第二高。
由此推論，就算美國負債驚人，但其國債魅力未減，而債市與美元走勢息息相關，故緊貼債市亦算是炒匯功課之一。
部署方面，既然短線方向難測，不如睇睇周線圖，看看有否啟示。首先英鎊強勢就係人都知，但原來周線圖顯示英鎊自去年十二月低見1.4814後，就一直反覆上升至今，期間只有小整固，近期更上破五年來最大阻力1.70關口。
往後英鎊會守穩其上，再繼續向上行？還是先作一次較似樣的調整，才再向上行？從基本面睇當然前者機會較高，但亦不妨做定兩手準備，一旦英鎊失守1.70後短期未能重返其上，不妨小注試沽，博調整後先至真正發力。
當然，膽博膽沽英鎊亦要做好心理準備，若然行得唔多順，跌得一兩日就跌唔落，便要及時逃生。
阿Lam