絲絲講場：馮氏總動員撐利標
利豐（00494）分拆利標品牌（00787）講咗咁耐，尋日終於順利上市，雖然利標首掛收市價麻麻，但上市儀式陣容贏晒。利標副主席兼行政總裁樂裕民（Bruce Rockowitz）獲任命為利標「揸Fit人」，拖住愛妻兼樂壇天后李玟（Coco）最早到港交所（00388）現場，以主人家身份招呼其他董事，包括利標獨立非執董盛智文。最驚喜嘅係，連馮氏一家都幾乎「晒冷」現身。
李玟變咗樂裕民粉絲
馮氏家族兩兄弟馮國經同馮國綸孖住出現唔在講，企喺樂裕民左右兩邊在台上任影之餘，一家大細仲喺台下撐場，馮國經之子兼新任利豐CEO馮裕鈞（Spencer）、馮國經女兒馮詠儀，甚至馮國綸太太等重量級家庭成員都準時參與上市儀式，港交所方面，主席周松崗晨早到場贈興。
至於樂裕民愛妻Coco，亦着得靚靚撐場，仲好似小Fans咁攞部手機幫老公影相，幸福洋溢。
馮裕鈞上位後首亮相
Spencer就內斂好多，尋日係佢榮升後首次公開亮相，但Spencer只係同絲絲換咗新卡片，接棒感言就大賣關子。唔知Spencer等到利豐中期業績再講嘅話，又可唔可以分散大家對佢接掌利豐CEO後首份成績表嘅注意力呢？
余絲韻