絲絲講場：雷軍派股醒金軟伙記
作為IT公司舵手，除咗要有遠見及魅力外，識得同員工講心又講金，亦係重要條件之一。事關對講求創意嘅行業嚟講，人才先係公司嘅最大資產。喺競爭劇烈嘅環境下，向員工送贈認股權早已並非同員工講金嘅最有效選擇。
同時身兼金山軟件（03888）主席嘅小米創辦人雷軍就嚟個「財散人聚」，將佢個人持有其中約值9,300萬港元嘅金軟股份，分派畀金軟嘅全體員工，以感謝員工嘅支持同激勵士氣。
每人獲贈股份值2.3萬
按金軟喺官方微博轉載，由雷軍發出嘅內部電郵，雷軍以感謝員工過去三年，對佢出任金軟主席所給予嘅支持同公司所獲成績為由，向董事會建議將自己三年前出任公司主席，獲授嘅400萬股金軟股份，以每人1,000股嘅方式，平均分畀金山所有正式員工，雖然呢批股份仲有兩年嘅禁售期，但以金軟尋日收報23.45元計，每位員工獲分嘅持股，就超過2.34萬港元。
雷軍形容今次向員工授出股份，是要推動金軟上下繼續向前奮鬥，又感性咁話，自己三年前係喺求伯君及張旋龍交托下，接任金軟嘅主席。當時亦正着力於小米手機嘅推出，金軟喺短短三年時間，能夠透過進軍移動互聯網業務，達成二次創業，甚至將獵豹移動喺美國獨立上市，靠嘅正正就係金軟員工嘅努力，又強調自己永遠會以作為金軟員工嘅身份而感到自豪添！
余絲韻