提到英國流行樂巨星艾頓莊（Elton John），除咗佢嘅首本名曲《Your Song》，你仲會諗起啲咩呢？如果你係佢忠實粉絲，絲絲相信你一定會聯想到Jax Coco椰子水。
而呢樽椰子水更唔止係一樽普通飲品咁簡單，皆因Jax Coco椰子水係由前對沖基金交易員Jane Gottschalk創辦嘅，總部就喺香港，產品亦都賣到去全球30個市場。
你可能會好奇，做乜阿Jane放棄對沖基金走去搞椰子水？如果你睇小佢你就大錯特錯喇，Jax Coco嘅銷售喺美國同歐洲舊年總和增長超過23%，超過8億美元。
相反，全球對沖基金資產喺過去六年（至一三年底）嘅增長每年都只不過係6%，阿Jane仲預期未來5年Jax Coco椰子水會成為一單價值20億美元（約156億港幣）嘅生意添。
其實呢款椰子水一直都幾受演藝界名人追捧o架，例如英國女藝人伊莉莎伯海莉（Liz Hurley）同英國女歌手蘇菲艾利斯 ─ 貝斯特（Sophie Ellis-Bextor）都不時會喺社交網絡大力推介。
佢個玻璃樽包裝係由設計師Stella McCartney嘅老公Alasdhair Willis負責設計。唔少巨星支持呢款飲品，傳奇音樂人艾頓莊仲捧埋一份，入股Jax Coco做埋品牌嘅共同擁有人。
余絲韻