絲絲講場：林家亨「羽」有榮焉

無耐之前絲絲先聽到恒豐證券研究部董事林家亨（Simon）贏咗今年第一場羽毛球比賽，事隔都唔夠兩個月，Simon又參加咗另一場公開賽，以男子雙打組合出戰，仲同香港甲組球員對戰。

雖然佢同Partner最後只係屈居亞軍，但佢話兩個對手加埋年紀仲細過佢自己，都算係雖敗猶榮啦。

原來Simon之前贏咗城大嘅羽毛球比賽之後亦不停練習，備戰香港文職及專業人員總會舉辦嘅羽毛球比賽。咁話明係公開賽，當然唔少得香港甲組球員啦，唔怪得Simon話今次比賽，係有史以來打得最辛苦嘅一場。

佢笑笑口話︰「之前打大學比賽都無咁辛苦，今次冠軍係香港最大嘅羽毛球隊一號種子隊員，我嘅水準最多咪高丙組球員少少。而且自己今年都已經五十六歲，佢地兩個後生仔年紀夾埋都唔夠四十五歲，搞到我一身汗水，之前都未試過打得咁辛苦。」

雖然Simon屈居亞軍，但絲絲就勁欣賞佢對羽毛球嘅熱誠，為咗今次比賽，Simon早兩個月已開始加緊練習，每星期打三次波。而且賽事係一日連打8場，鐵人都攰啦！Simon話佢完咗場賽事，番到屋企都無覺好瞓，手臂肌肉成晚不停咁跳動添！

余絲韻