Market Insight：和電香港吸引力增

儘管滙豐報告把港股由中性降至減持級別，以年終指數25,000點目標，昨收市計指數相當於仲有6.1%上升空間，對比年初至今嗰1%升幅，滙豐達標的話，查實對海嘯後習慣咗有波幅無升幅的本地股民，回報已經唔算差，不過，策略師眼中，其他股市有更高潛在回報。

話說回頭，建議減持又睇恒指見25,000點未算係最矛盾，手執報告，睇邊個市場指數潛在回報最高，依次是MSCI China（中國）的14%、FTSE MIB（意大利）13%、DAX 30（德國）及IBEX 35（西班牙）分別10%。居然最睇好中國，今時今日恒指成分股的中國企業比重咁高，點先可以中國升，香港唔升，確係夠耐人尋味。

古勝冇點你2014/07/09

萬里長空

游資充裕伺機突破

睇港匯昨升到7.7501水平，若非賭港匯脫鈎，相信游資充裕之下，短期港股改寫今年高位機會仲係比較大。上周三抽升358點後，大市何時先再嚟突破，股民務必睇實今明兩日中國經濟數據。

今日公布六月CPI，估計會由2.5%回落至2.4%，最終數字愈低愈好，意味人行有較大的財政空間去刺激經濟，包括全面降低存備金率。後日公布的六月進出口數字，大行估出口增長會進一步改善，由五月7%增長擴闊至10.4%，當然，如果最終高於此數，航運及出口股或者可以趁機出現突襲。

兩個流動電訊供應商，PCCW-HKT及CSL正式品牌合併，理論上，重組重疊網絡機站，電訊商節省營運成本，有助降低服務收費。但理想同現實始終兩碼子的事，昨日網上見到合併後收費表普遍上調，尤其帶機上台的高數據用量月費計劃，加幅接近三成。

如果到過美加及歐洲旅行都應該體驗到，香港流動電訊服務相對其他先進城市，是十二分之便宜。古勝早前去移民勝地溫哥華探朋友，諗住買張預付卡（prepaid）用幾日，除了每分鐘按時收費之外，連張sim卡都要用家自己買，先畀20元加紙（144港元）再充值入去先用得。同香港行入「七仔」，花幾十蚊就有交易，相差極遠。

競爭減少收費趨升

香港流動通訊收費咁平，關鍵係港府過往大刀闊斧開放電訊業市場，最勁係一九九六年一口氣發六個流動電話網絡（PCS）牌照，更於九九年全球最先推出流動電話號碼可攜服務，大大提高本地電訊商競爭。但時移世易，經過多年收購合併，香港持牌流動通訊商剩低四間，市場競爭減少，可預見將來本地流動通訊收費，恐怕有升無跌。

過去兩年，兩間上市電訊商數碼通（00315）及和電香港（00215），因為智能手機月費用戶ARPU升幅放緩，同期數據用量持續增加，使網絡成本增長比收入更快，拖累業績短期見頂。近期兩股股價逐漸重拾活力，正道出投資者對於未來服務收費及電訊商之間競爭減低的樂觀睇法，現價和電的預期息率有4.48厘，兩股之中似乎以佢較為吸引。

雖然昨日恒指繼續被點穴，但有隻藍籌表現不俗，就係聯想集團（00992）。近日《福布斯》公布「二○一四年中國上市公司CEO薪酬榜」，聯想主席兼首席執行官楊元慶榮登中資港股CEO榜首。昨日聯想股價亦似要「贈慶」，高位曾見10.86元，收報10.76元，升2.87%，成交股數6,163萬股，按日大幅增加4.5倍。

聯想宜逢回吐收集

早前有關收購IBM相關業務的交易可能延遲的消息，僅起短暫震倉作用，聯想股價反覆向上走勢未改。短線技術指標雖然呈超買，惟料無礙中長線升勢。

事實上，公司海外收購有利鞏固市佔率及提升競爭力，而母公司一四至一六年實現整體上市計劃，亦利好系內公司股價氣氛。

古勝可以預期，等第四季滬港通正式開始後，類似聯想呢類擁有內地知名的消費品牌的企業股份，不乏內地投資者垂青，估計年內餘下時間，聯想股價有條件再創新高（現時52周高位處11.28元），中長線可逢回吐收集。

古勝