絲絲講場：花旗做場戲 教細路理財
依家小朋友零用錢愈來愈多，教導兒童理財變得好重要，花旗環球個人銀行服務香港區總經理林鈺華（Christine）教三個囝囝囡囡時，都會灌輸下啲理財觀念，佢喺花旗舉辦嘅「創意理財即興劇比賽」傳授咗啲心得。
即興劇教正確觀念
銀行服務講求效率，原來使錢都要有效率，Christine話，同仔女講起用錢嘅問題時，都會要佢哋好好衡量吓點樣使錢，例如唔好咁着重用錢換取物質，應該諗吓點樣消費先可以達致長遠得益，例如學嘢同埋參加活動咁喎。
佢哋搞嘅「創意理財即興劇比賽」，都係表達呢個Message，今年有9間小學14隊組別參賽，每隊即場抽出所需要嘅故事場景同主題，冠軍嗰隊表演場景係「書展」，概念係「預算表」，故事講述一班學生喺買男明星寫真同埋買教科書之間掙扎，結局當然係小學生戰勝誘惑，買番啲有長遠價值既教科書，仲拎埋冠軍添。
Christine仲分享咗自己嘅一啲「延遲購買欲」經驗，佢話，自己唔多着重物質，因為工作太忙，所以購買欲都延遲咗。絲絲勸一眾購物狂，一於返多啲工令自己購物欲不停延遲，咁就有多啲錢做更有意義嘅事。
余絲韻