內地房地產業仲喺水深火熱之中，搞到呢個行業嘅CEO都冇運行，你睇吓福布斯中文版最新嘅「2014年中國上市公司最佳CEO」排行榜頭50位，一個內房CEO都冇，互聯網成為新嘅主力，多多少少反映中國嘅經濟周期不同行業嘅興衰。個榜嘅另一特色係大洗牌，舊年在榜嘅50人，45個冇得留低，競爭真係好激烈。
「中國最佳CEO」係根據佢哋掌舵嘅公司連續三年嘅經營業績，而非短期表現。相比去年，落榜嘅45名企業CEO主要從事房地產、醫療保健、銀行三大行業，新上榜嘅45名CEO，主要從事互聯網、醫療保健、媒體行業。今年排頭位嘅係樂視網嘅董事長兼總經理賈躍亭。
唔單只大洗牌，連佢哋嘅平均薪酬都大跌價，得番189萬（人民幣‧下同），低過去年平均薪酬655萬嘅三分之一。無計啦，舊年一班貴價CEO全部落榜（但唔等於佢哋差），好似聯想（00992）楊元慶、中國旺旺（00151）蔡衍明、騰訊（00700）馬化騰，佢哋唔單只係CEO，仲係集團主席。
呢個榜○五年已經有，本來叫「中國最佳老闆榜」。由於愈來愈多中國公司海外上市，前年開始範圍延伸至境外，即包含A股、中資港股及其他境外上市中國公司嘅CEO。
余絲韻