Market Insight：汽車股升浪未完

基金經理無嘢好炒，搵港匯強勢及滬港通故事，咬實隻港交所（00388）唔放，昨日再升3%收報154.1元，是第二大升幅藍籌，僅次於同樣係炒到無嘢炒至郁的中信泰富（00267），唔排除流入香港煲「滬港通」概念的資金正在吸納港交所。其實，除咗港交所之外，亦繼續見到中小型金融股在憧憬賣殼之下股價飆升。

資金博中央調控樓市政策轉向，開始由一線蔓延至二線內房股身上，昨日較好表現的綠城中國（03900），股價升3.2%報8.6元、合生創展（00754）升3.2%報8.03元、龍湖（00960）升2.7%報10.38元、中渝置地（01224）升1.9%報1.58元以及碧桂園（02007）升1.7%報3.54元。

古勝冇點你 2014/07/08

萬里長空

內房六月數據唔差

內房股陸續公布的六月銷售數據，普遍比四、五月時理想，較搶眼的有恒大地產（03333），六月合約銷售金額131億元（人民幣‧下同），按年升25.8%，合約銷售面積157萬平方米則升10.2%。而金額高於面積銷售升幅，主要係每平方米銷售均價按年升14.2%至8,347元所致。恒大首六個月合約銷售693.2億元，按年升55.4%。

雅居樂（03383）六月預售金額及面積分別為52.1億元及64.4萬平方米，比五月數字升60.3%及84%，如果同去年六月比較，則升61.3%及145%，主要係平均預售價格回落所致。

水泥價格回落添憂

早前私有化落空的台泥國際（01136），昨日收市後發盈利預喜，預告中期業績會較一三年大幅增長，主要受惠於期內水泥及熟料平均售價上升，毛利率大幅改善所致。睇番一三年台泥賺16.75億元（港元‧下同），上半年貢獻大約三分之一。

由於華潤水泥（01313）及安徽海螺水泥（00914）亦已發盈喜，估計水泥行業上半年情況，唔會比去年下半年差太遠，在去年上半年比較基數較低下，業績有較大幅增長是預期之內。問題是，第二季尾行業步入淡季，水泥價格因為需求轉弱已開始回落，究竟會持續幾耐。

唔少人都知，德國總理默克爾夫人是超級足球迷，早兩日受訪華行程影響，無辦法入場親身為德國隊打氣。

咁大犧牲當然唔係純粹為兩國聯誼，學吓點煮宮保雞丁做川菜咁簡單！據知訪華行程，重點是中德企業在環保新能源汽車技術合作，被視為訪華重點。近日寶馬喺香港首度展出的油電混能跑車i8，定價253萬元，差不多買到半層香港細價樓，講環保，代價真係唔細！

唔知同默克爾訪華有冇直接關係，近排在下見到幾隻汽車股表現都明顯優於大市。六月初至今，華晨汽車（01114）、東風（00489）及廣汽集團（02238）升幅分別達20%、19%及17%。早個多星期前，有消息話華晨提早同德國寶馬傾延長合作期限去到二○二八年，以便寶馬方面把更多車款引進到內地生產。

睇華晨股價，兩個多星期由13元炒到上昨日的16.06元，確實唔似空穴來風。急升後，華晨一四年預期市盈率14.8倍，以今明兩年預期盈利增長29.2%及19.7%，PEG未夠一倍，短期有超買情況，但唔能夠話佢因此而唔抵買。

華晨東風看高一線

汽車股中，東風估值向來較低，相信同佢貴為內地三大汽車集團，營銷基數相當大，業績爆炸力不及其他車股，其次入股法國汽車製造商標緻雪鐵龍的交易，之前市場反應是好壞參半。

古勝之前亦走漏眼，自五月雪鐵龍的供股計劃塵埃落定，加上東風旗下東風日產、本田及標緻雪鐵龍，下半年推出車款陸續曝光，市場初步反應唔錯，連續兩年跑輸大市的東風，出現報復式反彈，由10元邊起步，去到昨日創埋52周高位，見過14.72元，收報14.68元。

到底仲可以升幾多？以東風現價計，一四年市盈率8.6倍，過去四年東風介乎6.1至11倍市盈率之間上落，如果上述兩個使市場突然轉向睇好的因素成立，估計下半年股價唔難去到10倍樓上，即17元左右。同華晨一樣，中期升浪相信仲有餘未盡。

古勝