孖妹S檔案：金融才俊趣悟投資道
孖妹雖然忙，不過都好注重生活質素，最近收咗市就會去跳最Hit嘅韓流K-POP舞，乘機加深對南韓市場嘅了解。我哋最近發現有幾位金融界朋友都同樣識得利用閒餘嘅時間，去發展個人興趣，仲去到專業級嘅程度添！唔知會唔會帶動到投資靈感呢？
王：易方資本投資總監 王華
操盤重平衡 如扒獨木舟
Kitty：估唔到你除咗鍾意打羽毛球及乒乓球之外，仲考過獨木舟三星章，你覺得玩獨木舟學到啲乜？
王：玩獨木舟需要喺海上漂浮，即使每次都會同朋友成群結隊出海，但因為舟與舟之間會保持距離，其實都幾孤單，而且回程體力已消耗得七七八八，而傍晚上岸會遇上潮退沖番你出海，天黑時你扒極都上唔到岸都幾驚o架！所以呢項運動可以鍛煉意志、獨立思維同耐力。
彩兒：點解我次次玩獨木舟都行唔到直線o架？
王：划槳技巧好重要，左右手力度要平衡，初初開始玩嗰陣，隻舟真係行到S形咁o架！其實原理就如對沖基金做投資，長短倉嘅策略亦要平衡，旨在將不可預測或沒有把握嘅元素抽走，例如，你看好日股，但看淡日圓，就可做日股長倉，同時做日圓短倉，咁做法受大市影響度就會下降，亦可維持平穩回報。反觀，如果側重長倉，基金回報便會大上大落。
Kitty：你仲喺獨木舟度領悟到乜嘢投資竅門，不如過兩招畀我。
王：划槳講求陰陽協調，節奏非常重要，若單靠蠻力，獨木舟就唔會向前，另外重點係要保持均速，留力喺回程時上岸。我喺操盤時亦講究節奏，一般會乘着誘因投資股票，喺股價向上時、突破平均線嘅情況下會順勢不斷加注，不過，無論輸贏都要保持平常心。
彩兒：玩獨木舟會有既定路線同中途站，途中又要觀察大環境，好似水流同天氣，不斷因應實際環境改變航度，唔通你投資都會五時花六時變？
王：投資時要從基本面及資金面作分析，以微觀及宏觀方法同步分析投資氣候，就好似偵探般重組案情，所以我經常會出現「今日的我打倒昨日的我」嘅情況，要不斷重新估算大環境，順應最新狀況重新出發，咁先係我嘅致勝之道。
幸：思博資本管理合夥人 幸正權
安全出海 留意市況咪亂博
Kitty：金融人雖然薪高糧準，但係壓力滿瀉，聽聞你會揸遊艇出海減壓喎。
幸：我九九年加入滙豐證券做亞洲區衍生工具部主管時，所有董事級職員每月都有一次使用公司遊艇嘅福利，我喺○一年開始考船牌，○二年考獲目前考試合格率不及兩成嘅一級船主牌，○六年離職時我就以近千萬元買入首隻遊艇，依家每星期出海兩、三次，簡直心矌神怡！
彩兒：玩遊艇使費都幾大，你唔肉赤咩？
幸：我實在太鍾意意大利豪華型遊艇，今年仲入股遊艇分銷公司添！其實保養一艘遊艇，每年嘅支出約為船價5至8%，自己做分銷嘅話，無論維修或改裝都快手好多。部分歐洲遊艇未必適合喺香港用，好似冷氣或者未必夠凍，當年我收船後，就用咗近百萬元改裝咗成年先收貨。
Kitty：金融人個個得閒死唔得閒病，你點抽時間去玩？
幸：以前港交所（00388）未延長交易時間，我不時會喺午飯時間買個飯盒，就即刻開遊艇出海玩滑水，但喺加時後嘅交易日，就只可以喺收市後趕上船，出海歎咖啡、睇日落，所以新例出台後都幾嬲o架！依家每逢周末我都會帶太太，同埋三個囝囡出海玩，不時都會喺船上過夜，趁機增進家庭關係。
彩兒：你以前做過交易員，揸船同投資會唔會一樣咁急進？
幸：我鍾意速度感，後生嗰陣時鍾意喺高風險嘅期貨短炒中尋求刺激，但自從愛上航海就逐漸體會到安全至上，需有全盤計劃先會出發，投資都一樣，因為個人風險承受能力隨年齡遞增而下降，我喺資產配置上會嚴守以年齡為本嘅投資計劃，目前因為年近50歲，個人資產組合中有約四成係較低風險嘅固定收益產品，好似債券，其餘資產包括基金、外匯、股票及期貨。
出海最重要係順勢而行，天氣狀況及水流是重要一環，出發前我會睇天氣報告，風速若達六級以上便絕不出發。我○七年同家人朋友出海，其後喺沙灘玩，竟突然遇上低氣壓，親眼見到遊艇喺海上打轉，我哋用盡九牛二虎之力先上到船，即時開船避開風暴。喺投資時，見到大環境突變時都要識避險，○九年後市場由經濟市轉為政策市，就好似水流轉變咁，投資就要迎合市況。
郭：澳洲會計師公會企業事務委員會聯席主席 郭百祥
資產配置 要啱自己口味
彩兒：你上個月考到「Coffee Master」咖啡師資歷，係咪好難o架？
郭：個課程分六大範疇，包括咖啡歷史、原產地、特性、種植過程、沖製方法等，讀完課程需時12星期，之後要筆試、口試、即場沖調及講解，要記熟所有資料，真係有難度o架！為求試盡所有調製咖啡嘅方式，屋企已有逾20種由數十元至近萬元不等嘅沖調器具，多到太太都唔畀放。
Kitty：咖啡咁苦，有乜值得你迷戀喎？
郭：我以前喺「咖啡之都」──澳洲墨爾本修讀大學課程，算係我接觸咖啡嘅第一步，嗰陣我喺Coffee Shop做兼職搵零用錢，覺得Cappuccino好好飲，不過，其實當時對咖啡嘅了解相當膚淺，畢業後我做咗會計師，咖啡就順理成章成為我工作伴侶。自我初出茅廬做會計師至今轉行擔任香港及澳門星巴克營運總監的廿載間，每天最少都會品嘗一杯咖啡o架！
隨品嘗咖啡嘅經驗日增，我發現品嘗咖啡其實與品嘗紅酒相似，可由其特性如味道層次、酸度、烘焙程度等方面試味。咖啡並無好壞之分，最緊要是合個人口味。
彩兒：你無論去邊旅行都會特登參觀當地嘅特色咖啡室，仲會鑽研唔同咖啡嘅背景同口味，個人投資又有冇咁勤力先？投資取態會唔會跟住你啲咖啡口味一路變？
郭：我一定會深入研究分析先會入場投資，選擇股票更加有既定流程，我首先會睇公司管理層是否穩定、生意商機、行業發展空間，再睇公司財務數據，計算公司內在價值。
雖然工作繁忙，我每天都會爭取時間為自已沖調稱心嘅咖啡，不過依家嘅至愛已由昔日學生時代花巧嘅泡沬咖啡，轉變為口味平順、重可可味嘅原味黑咖啡，近期新寵為埃塞俄比亞嘅日曬咖啡豆。喺投資方面，我就趨向穩守，目前嘅資產組合平均放置喺股票、外幣及物業投資，尋求長線、穩健回報嘅投資。
彩兒 Kitty
若有料報畀彩兒同Kitty或有嘢問，可電郵money.biz@on.cc