日本今年四月起調高消費稅，消費者個個嗌救命。日本新生銀行調查發現，掌管家庭財政大權嘅日本渡邊太太們好識做，「大破慳囊」每月畀丈夫嘅零用錢，較去年多2.9%至39,572日圓（約3,042港元），係兩年嚟首見「加薪」。
其實呢筆零用錢比起金融海嘯前低好多，較八九年當地資產泡沫頂峰時仲少足足近半。睇番○八年，日本打工仔每月零用錢有48,825日圓。
日本唔少餐廳推出500日圓午餐，調查顯示，打工仔嘅午餐費平均係541日圓。不過，佢哋飲酒就闊佬啲，每次小酌幾杯嘅使費就要3,483日圓，之不過以佢哋每個月平均出去飲酒2.4次嚟睇，都唔算過分啫。
日本薪酬水平係咁跌，通脹喺日央行放水下升溫，打工仔嘅實質收入可以話係有減無增，想外出吃喝玩樂都要計過度過呀。
余絲韻