接受虛擬貨幣Bitcoin（比特幣）進行不法活動嘅網站「絲路」（Silk Road），舊年畀美國執法部門冚檔，充公咗超過14.4萬枚Bitcoin，司法部定咗今日拍賣當中2.95萬枚，以尋日彭博報價低位每枚557.7426美元計算，Bitcoin拍賣市值坐底1,645.34萬美元（約1.28億港元），大大小小嘅投資者已經雙眼發光，不停向當局查詢。
準備競投嘅大戶包括獲Fortress投資集團注資嘅對沖基金Pantera資本管理，而另一對沖基金Global Advisors，同埋交易所SecondMarket就組織財團入場，嚴陣以待，前者合夥人之一馬斯特斯講明有意長揸，照咁睇可能唔少對沖基金都想進軍Bitcoin。
市場反應咁踴躍，事關Bitcoin數量有限，流動性低，交易只要涉及500枚都足以影響價格，而華府拍賣接近3萬枚Bitcoin令供應一下子大增，推低價格，擺明係大手掃平貨嘅黃金機會啦。
不過，計絲絲話，Bitcoin價格咁波動，月初升上680美元之後就搏命跌，難得市場仲大把人吼，司法部今次真係鬆口氣！
余絲韻