新經濟打倒舊經濟，又多一個例證！簡稱BAT嘅百度、阿里巴巴及騰訊（00700），分別打低舊經濟嘅工商銀行（01398）、建設銀行（00939）同娃哈哈，奪得《2014胡潤品牌榜》不同領域嘅頭三位。
胡潤研究院發布咗《2014胡潤品牌榜》，有200個最具價值嘅中國品牌名列榜上。最令人觸目嘅莫過於係騰訊嘅成績啦。佢以2,080億元嘅品牌價值，爬過咗中國移動（00941）同工商銀行，第一次成為「最具價值中國品牌」。唔止咁添呀，佢仲超越百度做埋「最具價值中國民營品牌」。
百度都唔弱o架，取代咗建設銀行打入以北京為總部企業最具價值品牌嘅前三，而天貓都取代咗娃哈哈打入浙江最具價值品牌嘅前三位。馬雲、馬化騰、李彥宏呢三個IT巨頭，呢一年真係未逢敵手。
騰訊今次就認真威威啦，九八年先至成立，咁快就做品牌一哥，品牌價值年年都升，比舊年仲增長咗1.4倍。工商銀行就冇咁勁喇，品牌價值比上年跌16%，暫時守住個亞軍地位啦。
馬雲仲係第一個將三個品牌（淘寶、天貓、支付寶）同時打入胡潤品牌榜之餘，又位列民營品牌10強添。而天貓同支付寶仲係上榜品牌中升幅最大。
余絲韻