期指觀瀾：升穿23397追買未遲
經過兩日半死不活的悶局，期指好友趁結算前一日先出手，指數昨高開81點後愈升愈有，重返10日線23,111點樓上，高見23,203點，收23,197點升331點，返到去上周五個交易日高低位23,122至23,340點內，只得218點的窄幅上落區，主板成交525億元。
周一無緣無故的下挫，到周二、三呈整固，周四來一個還原基本步，仿似無事發生過一樣，缺乏方向兼現貨成交疏落的市況，期指大戶想開邊瓣就開邊瓣。即月及下月期指，日市收23,192及23,120點，較合理值分別低6點及高37點。
今日結算，真心希望「五窮六絕」的講法成為事實。睇番過去一個月，恒指高位在六月十三日的23,397點，低位是本周一的22,802點，全個月波幅595點，對期指玩家相當致命，好似周一假如博指數跌穿22,950點，技術上可以行多浸，昨肯定要扯白旗投降。
同樣地，昨抽升是否意味短期打破悶局，個人認為不宜倉猝定奪。過去五日沽空佔大市成交比例偏低，維持在單位數，後市挾淡友的誘因稍嫌不足，指數表面大升超過300點，但事實也只返回六月上旬的大型上落區之間，要追買，似乎仲係等指數確認升穿23,397點收市先好。
John Mullen